DILI– Eskola Sekundariu Geral no privadu hamatuk 16 sei harame taxa esperansa 2023 no dadaun ne’e eskola 9 mak komfirmadu ona atu kompete.
“Jogu ida ne’e ami konsentra liu ba estudante sira tanba ami hanoin katak liu hosi estudante sira ita tenta atu armoniza entre sira para iha sentimentu patriotismu entre sira no hadook ona sira hosi konflitu” dehan kordenadór Komisaun Organizadora Domingos Caeiro ba jornalista sira Tersa (15/08).
“Taxa esperansa ne’e mosu ami konvida deit eskola hamutuk 16 i komfirmadu eskola 9 ona so eskola seminariu menor la partisipa tanba estudante sira kuaze iha postura ne’ebe kiikkoan nune’e sira la partisipa maibe Komisaun Organizadora iha ona ekipa rezerva ne’ebe mak prontu atu subtitui atu partisipa iha Taxa Esperansa ne’e rasik” nia explika
Nia informa, joven nuudar futuru nasaun tanba ne’e mak tinan ne’e sira konvida estudante sira dili laran, no ba futuru sei mos estudante sira iha munispiu sira
“Taxa ne’e ho objetivu atu komemora loron falintil ba Dala 48 no komemora loron konsulta populár ba Dala 24, hosi ne’e ita bele loke ona ita nia estudante sira nia hanoin katak luta ba ukun rasik aan ne’e laos buat fasil ida” nia haktuir.
Nia afirma, eskola 16 ne’ebe atu partisipa ne’e Komisaun Organizadora halo selesaun no kada postu administrativu ida sei reprezenta hosi eskola 4
Eskola sira ne’e mak hanesan ESG 12 de Novembro, Sagrada Corasao De Jejus, Herois Da Patria, An-Nur, Sao Miguel, Cristal 4 de setembru santa madalena de Canosa no seluk tan.
Jogu ne’e sei hala’o ho metade de kompetisaun No tuir planu sei abertura iha loron 30 fulan agustu ne’e.
Iha fatin hanesan, Vise Kordenador ba Taxa Esperansa, Adilson Ribeiro, hatete, torneo ne’e ba Eskola Sekundariu nian entaun Komisaun Organizadora la foti fee ruma hosi rejistrasaun, rejistu gratuita no komisaun mos perpara ekipamentus jogus nian ba ekipa 16 ne’ebe mak atu mai tuir sira sei hetan farda kompletu ho meas.
“Ami mos perpara orsamentu oituan ba sira atu halo perparasaun signifika katak ekipa ne’ebe mak atu mai tuir mai deit” tenik nia.
“Despois ami mos hakarak hasae nivel jogu ne’e sa’i kualidade oituan entaun ami mos halo akordu ida halo servisu hamutuk ida ho asosiasaun Treinador ami tau standar ida mos katak ekipa ne’ebe mai tuir nia Treinador mos tenke nivel C para atu hasae kualidade torneo ida ne’e” Nia informa.
Konba orsamentu ba perparasaun Komisaun Organizadora la fo sa’i ba publiku tanba konsidera katak konfidensial maibe sira garante eventu refere sei lao to’o remata
Iha sorin seluk Diretor Kompetisaun Joao Campos, haktuir, “Kopa Esperansa fila fali iha tinan ida ne’e depois de 2000 kedas Kopa ne’e la la’o tanba ita hatene katak inferstutura ne’ebe iha ita nia rain foin mak ita hetan depois de 2010 sae mai leten.
“Kopa esperansa ne’e rasik hahu inisia iha 2000 depois de ita ukun aan konsulta populár hotu iha 1999 entaun joven hirak ne’ebe mak halibur aan iha radiu falintil tenta atu hamosu torneo ne’ebe ema barak gosta iha tempu ne’eba inisia hosi Nilton Gusmao, Aquita Tamalaka (MATEBIAN), Filomeno Fernandes (MATEBIAN) Pilino Lewis Gusmao iha tempu ne’eba sira mak inisia Kopa esperansa Ne’e i ohin ita hahu fila fali iha 2023 IHA ambitu komemorasaun loron falintil nian ba dala 48 no mos konsulta populár ba Dala 24” Nia haktuir.
“Premiu ba partisipantes sira ne’ebe sei hetan mak primeiru lugar hetan osan ho montante 2000 iha mos Medalla i ba iha segundu lugar nian sei hetan osan ho montante 1500 ho medalla ba terseiru lugar mos sei hetan osan 1000 dolar ho medalla no ba kuartu lugar sei hetan deit osan 500 dolar, no mos sei iha premiu ba emllor markador atu motiva estudante nivel Sekundariu sira atu bele hasae sira nia kualidade” Nia informa.
“Ami mos agradese ba FFTL ne’ebe mak autoriza ona ami atu hala’o jogu esperansa Ne’e hala’o iha kampu FFTL” dehan Nia
Entertantu apoiu kanpatrosimador Ba Taxa Esperansa ne’e mak kompanha Eto, Gota, Britas, Kafe Timoroan (KATON)
JHD
