DILI — jogu kontinuasaun Taça Esperança 2023 faze apuramentu pool (B) Eskola Sekundariu Externato São José susesu rekoila pontus tolu (3) hafoin halakon nia adversariu, Eskola Ekonomia e Comercio (EEC) Becora ho score fantastiku 5-2.
Hala’o jogu iha kampu Federasaun Futebol Timor-Leste (FFTL) formoza Dili sexta (01/09) ne’e iha inisiu jogu ekipa rua ne’e hotu hotu hala’o jogu ho kuidadu hodi lansa kontra atake ba malu.
No tama ba iha minutu 21 ekipa Externato São José konsege sobu defeza eskola EEC Becora hodi produs golu ida liu hosi asaun jogador Jorge Oliveira hodi lori nia ekipa Externato São José lidera uluk ho score 1-0.
Ho golu ne’e halo tensi jogu komesa manas liu tan no tama ba iha minutu 30 Externato São José aumenta tan golu ida liu hosi Marcelo Antonio hodi muda score ba 2-0.
Liu deit minutu 6 Jorge Oliveira marka fila fali tan nia naran hodi lori nia ekipa lidera ho score 3-0 to’o termina jogu primeira parte.
Tama ba jogu segunda parte intensidade jogu komesa makas ba ekipa rua ne’e hodi lansa kontra atake ba malu no tama ba iha minutu 49 Externato São José haboot liu tan score ba 4-0 liu hosi jogador José Pinto.
EEC Becora foin responde golu ida iha minutu 60 liu hosi jogador Octavio Soares hodi hamihis score ba 4-1.
José Pinto marka tan nia naran iha minutu 66 hodi lori nia ekipa Externato São José haboot hikas score ba 5-1 iha minutu 66.
Liu deit minutu rua EEC Becora konsege responde hikas golu ida hodi muda score ba 5-2 liu hosi asaun Flaviano Martins.
Hosi rezultadu vitoria ne’e lori ekipa Externato São José lidera ho pool (B) ho pontus 3 enkuan ekipa EEC Becora okupa iha pozisaun ikus liu ho pontus 0.
JHD
