DILI– Ensinu Sekundariu Geral, no Tekniku Vokasional Colegio São Miguel Arcanjo (CSMA) susesu rekoila pontus 3 iha jogu dahuluk faze apuramentu pool (C), hafoin halakon nia adversariu Ensinu Sekundariu Geral 5 de Maio ho score 3-2.
Iha inisiu jogu ekipa rua ne’e hala’o jogu ho kuidadu tebes, maibe ekipa Sao Miguel ne’ebe mak domina liu bola konsege halo linha defeza 5 de Maio atrapalha ho nune’e jogu foin hala’o deit minutu 2 Sao Miguel hetan oportunidade osan mean hodi produs golu liu hosi suta penalidade.
No Escolario de Jesús ne’ebe mak sa’i ezekutor falla hodi produs golu ho nune’e score 0-0 mantein la muda.
Maske falla hodi marka golu maibe la hamate espiritu jogador hosi ekipa CSMA hodi kontinua lansa presaun hasoru eskola 5 de Maio, no tama ba iha minutu 32 Fildo dos Santos susesu fura rede eskola 5 Maio hodi hatuur score ba 1-0.
Ho golu halo ekipa CSMA kontinua domina liu tan bola no tama ba iha minutu 39 Fildo dos Santos fura tan rede 5 de Maio hafoin aproveita bola barullu iha area grandeal hodi haboot score ba 2-0 to’o termina jogu primeira parte.
Tama ba segunda parte intensidade jogu komesa manas liu tan ba ekipa rua ne’e hodi lansa kontra atake ba malu maibe ekipa CSMA ne’ebe mak hahu monu iha rejistensia halo ekipa 5 de Maio aproveita hodi halo presaun makas ho nune’e tama ba iha minutu 60 5 de Maio konsege hamihis score ba 2-1 liu hosi jogador Celestino Dos Reis.
Ho golu ne’e halo ekipa 5 de Maio kontinua halo presaun ba ekipa CSMA no tama ba iha minutu 75 Tiago Silva susesu fura rede CSMA hodi halo balansu ba score sa’i 2-2.
Ho score refere jogu sa’i manas liu tan ba ekipa rua ne’e hodi lansa presaun makas ba malu no tama ba iha minutu 80+1 Abilio Martins susesu fura rede Eskola 5 de Maio hodi lori nia ekipa CSMA lidera hikas ho score 3-2 to’o termina jogu segunda parte vitoria ba CSMA.
Jogu ne’ebe hala’o deit ho tempu minutu 80 ne’e la hamate espiritu kompetetivu estudante sira atu hatudu sira nia skill no talentu ne’ebe sira iha.
Entertantu ho rezultadu vitoria ne’e hatuur ekipa CSMA iha pozisaun daruak ho pontus 3. No ekipa 5 de Maio ne’ebe mak sofre derota okupa iha pozisaun datoluk ho pontus 0.
Enkuantu iha pool (C) eskola 4 de Setembru mak ukun provizoriu tabela klasifikasaun ho pontus 3 hanesan ho Colegio São Miguel Arcanjo maibe liu produtividade golu.
JHD
