DILI– Jogu kontinuasaun Taça Esperança 2023, faze apuramentu pool (C) ekipa hosi Ensinu Sekundariu Geral (ESG) 4 de Setembru susesu rekoila pontus 3 hafoin tidin nia adversariu Eskola São José Operario ho score fantastiku 7-1.
Hala’o jogu iha kampu Federasaun Futebol Timor-Leste (FFTL) formoza Dili Sabadu (02/09). Desde inisiu jogu ekipa rua hala’o jogu ho tensi ne’ebe mak aas hodi lansa presaun ba malu maibe eskola 4 de Setembru ne’ebe mak hatudu ritmu jogu ho diak konsege domina liu bola ho nune’e jogu foin hala’o deit minutu 3 Ronaldinho Fatima susesu loke uluk golu ida hodi lori nia ekipa 4 de Setembru lidera ho score 1-0.
La hein tan tempu naruk ba Eskola 4 de Setembru tanba liu deit minutu 3, Rifabiano da Conceicao susesu fura rede eskola Sao José Operario hodi muda aumenta score ba 2-0.
Ho golu rua tuir malu ne’e Eskola Sekundariu Sao José Operario hahu halo linha defensivu ne’ebe mak solidu hodi frekuenta eskola 4 de Setembru maibe tama ba iha minutu 28 Leonardo dos Santos susesu fura rede Sao José Operario hodi muda aumenta score ba 3-0.
Eskola Sao Operario foin mak responde golu ida iha minutu 36 liu hosi inacio dos Santos ho suta penalidade hodi muda score sa’i 3-1.
Maibe liu deit minutu rede Sao José Operario nakdoko hikas liu hosi asaun Patricio da Silva hodi lori nia ekipa 4 de Setembru haboot liu tan score ba 4-1 to’o termina jogu primeira parte.
Iha segunda parte 4 de Setembru la hatun sira nia ritmu jogu hodi kontinua lansa presaun makas ba ekipa Sao José Operario ho nune’e tama ba iha minutu 57 Marcio da Costa susesu fura rede Sao José Operario hodi muda aumenta score ba 5-1.
Liu deit minutu ida rede Sao José Operario nakdoko hikas liu hosi Donaldo da Savio hodi lori nia ekipa 4 de Setembru lidera ho score 6-1.
Festa golu hosi Eskola 4 de Setembru taka ho auto golu hosi jogador Joao Belo iha minutu 62 hodi termina jogu ho score 7-1.
Hosi rezultadu vitoria ne’e hatuur ekipa 4 de Setembru lidera provizoriu pool (C) ho pontus 3 hosi jogu dala ida no ekipa Sao José Operario okupa iha pozisaun ikus liu ho pontus 0.
Jogu ne’ebe mak hala’o deit ho tempu minutu 80 ne’e la hamate espiritu kompetetivu estudante sira atu hatudu sira nia skill no talentu ne’ebe mak sira iha.
JHD
