DILI– Ensinu Sekundariu 5 de Maio susesu koileta pontus tolu hosi adversariu Colegio São José Operario ho score fantastiku 5-1, iha jogu daruak Taça Esperança 2023, faze apuramentu pool (C), ne’ebe mak hala’o iha kampu Federasaun Futebol Timor-Leste FFTL Dili Sexta (08/09).
Eskola 5 de Maio hala’o ho ofensivu desde inisiu jogu, no rezultadu jogu foin hala’o deit minutu 1 eskola 5 Maio lidera ona ho score 1-0 liu hosi asaun Tiago da Silva.
Ho golu sedu ne’e halo ekipa Colegio São José Operario hahu hala’o ho kuidadu hodi halo ofensivu hodi buka oportunidade atu halo kaunter atake ne’ebe efetivu maibe to’o termina jogu primeira parte score mantein 1-0.
Kontinua ba segunda parte jogu foin hala’o minutu ida 5 de Maio halo tan rede Sao José Operario nakdoko liu hosi asaun Caetano Cesario hodi muda aumenta score ba 2-0.
Liu deit minutu tolu rede Sao José Operario nakles tan dala ida liu hosi asaun Jesunho de Asuncao hodi hasae score ba 3-0.
5 de Maio kontinua domina bola hodi lansa presaun makas ba Sao José Operario no tama ba iha minutu 51 asaun Jaimito de Araujo haboot liu tan score ba 4-0.
Eskola Sao José Operario foin mak responde golu ida iha minutu 58 liu hosi asaun Anastacio Fernandes hodi muda score sa’i 4-1.
No tama ba iha minutu 63 eskola 5 de Maio haboot hikas score ba 5-1, liu hosi asaun Celestino Dos Reis. Ho golu ne’e mos mantein hodi taka jogu segunda parte vitoria ba 5 de Maio.
Hosi rezultadu vitoria ne’e lori ekipa 5 de Maio dudu tun CSMA iha pozisaun daruak hodi okupa hikas iha pozisaun daruak ho pontus 3 hosi jogu dala rua manan ida no derota dala ida.
Enkuantu ekipa Sao José Operario iha pozisaun ikus liu ho pontus 0 hosi jogu dala rua deorta hotu no iha pozisaun dahuluk okupa hosi CSMA no iha priemeiru klasifikasaun provizoriu pool C okupa hosi ESG 4 de Setembru.
JHD
