DILI– Jogu kontinuasaun Taça Esperança 2023, faze apuramentu pool (C), Ensinu Sekundariu Geral (ESG), 4 de Setembru susesu koileta pontus tolu hafoin “dere” adversariu Ensinu Sekundariu Geral no Tekniku Vokasional Colegio São Miguel Arcanjo (CSMA) ho score 3-0.
Jogu entre ekipa rua ne’e hala’o iha kampu Federasaun Futebol Timor-Leste (FFTL) formoza Dili Sexta, (08/09).
ESG 4 de Setembru hala’o jogu ho agresivu desde inisiu jogu primeira parte, hodi lansa presaun makas ba ekipa Eskola Colegio São Miguel Arcanjo, maibe ekipa Sao Miguel ne’ebe mak hala’o jogu defensivu la fo fatin ba ekipa 4 de Setembru hodi produs golu.
Maibe tama ba iha minutu 30, Leonel dos Santos susesu lori nia ekipa 4 de Setembru lidera ho score 1-0, hafoin hala’o jogu hosi ain ba ain hodi ultrapasa defeza hodi produs golu.
Ho golu ne’e halo tensi jogu komesa manas ba ekipa rua ne’e maibe to’o termina jogu primeira parte la iha tan golu ruma mak akontese ekipa 4 de Setembru mantein lidera ho score 1-0.
Kontinua ba jogu segunda parte intensidade jogu komesa manas liu tan, São Miguel ne’ebe mak hala’o jogu defensivu iha priemeira parte halo kedas subtituisaun ba jogador hodi hala’o jogu ho ofensivu rezultadu ekipa CSMA konsege hetan oportunidade hodi suta fila fila ba rede 4 de Setembru maibe sei bele antisipa hosi guarda rede.
Tama ba iha minutu 68 rede CSMA tenke nakdoko hikas hafoin eskola 4 de Setembru halo kaunter atake ne’ebe mak lais hodi fura rede CSMA nafatin liu hosi asaun Leonel dos Santos hodi lori nia ekipa lidera ho score 2-0.
Maske sofre ona golu rua maibe la hamate espiritu kompetetivu estudante CSMA hodi lansa kontra atake ba 4 de Setembru maibe dala ida tan rede Sao Miguel tenke nakdoko ba dala tolu liu hosi asaun Rifabiano Conceicao iha minutu 75.
Ho golu ne’e halo ekipa 4 de Setembru hahu hala’o jogu ho kalma hi nuneyla iha tan golu ruma mak akontese to’o termina jogu segunda parte vitoria ba 4 de Setembru ho score 3-0.
Hosi rezultadu vitoria lori ekipa 4 de Setembru nafatin tuur metin iha pozisaun dahuluk ho pontus 6 hosi jogu dala rua manan hotu.
Enkuantu ekipa CSMA tenke fila fali ba iha pozisaun daruak ho pontus 3 hosi jogu dala rua manan ida no derota dala ida.
JHD
