DILI – Hafoin sofre derota dala rua tuir malu kontra Kuwait no Iraq, selesaun nasional Timor Leste, hader hikas iha jogu ikus hodi hurlele nia adversariu Macau ho score fantastiku 5-0, iha jogu kualifikasaun AFC Asian Cup U-23 faze apuramentu pool (F).
Iha jogu dahuluk Timor Leste derota ho Kuwait ho score 4-0, no jogu daruak ekipa Lafaek sofre tan derota ho nia adversariu Iraq ho score 6-0.
Ho derota dala rua ne’ebe mak selesaun nasional sofre obriga ekipa Lafaek nurak tenke husik hela Billete ba Asian Cup Qatar 2024. Maibe iha jogu ikus Timor Leste halo festa golu ba rede Macau ho score fantastiku 5-0.
Hala’o jogu iha Ali Subah Al-Salem Stadium, Kuwait City, Kuarta, (13/09). Timor Leste hala’o jogu ho agresivu hodi lansa kontra atake ba Macau no rezultadu jogu foin hala’o minutu 13 Mouzinho Bareto de Lima susesu lori Timor Leste lidera ho score 1-0.
Ho golu ne’e halo ekipa Lafaek domina liu tan bola no tama ba iha minutu 20, Ricardo Bianco susesu fura rede Macau hodi hasae score ba 2-0.
Ho Score refere tensi jogu kontinua manas liu tan maibe to’o termina jogu primeira parte score mantein 2-0.
Kontinua ba jogu segunda parte intensidade jogu komesa makas liu tan ba ekipa rua ne’e hodi lansa kontra atake ba malu no tama ba iha minutu 60 Cristovao Fernandes halo tan rede Macau nakdoko hodi muda aumenta score ba 3-0.
Lidera ona ho score 3-0, Timor Leste kontinua domina bola no tama ba iha minutu 74, Zenivio Mota susesu fura rede Macau hodi haboot liu tan score ba 4-0.
Festa golu Timor Leste taka ho golu hosi Luis Silva iha minutu 82 hodi hatuur score ba 5-0.
Ho rezultadu vitoria ne’e hatuur ekipa Lafaek iha pozisaun da tolu ho pontus 3 hosi jogu dala 3 manan dala ida no derota dala iha faze grupu.
JHD
