DILI — Carlos Soares susesu marka golu tolu alias (hattrick) hodi lori nia ekipa Ensinu Sekundariu Nikolau Lobato haka tba Quatros Finais Taça Esperança hafoin manan ekipa adversariu Eskola Santa Madalena de Canossa ho score fantastiku 5-0, iha kampu FFTL formoza Dili Quarta (13/09).
Jogu kontinuasaun Taxa Esperansa 2023, faze apuramentu pool (A) Canossa ne’ebe mak antes ne’e manan dala rua tuir malu iha kontra Café Taibesse no Sagrada Corasao De Jejus (Sacrojes) falla hodi sa’i kampeaun grupu hafoin sofre derota ho Nikolau Lobato.
Ho pontus 3 ne’ebe mak Nikolau Lobato koileta iha jogu ikus ne’e susesu lori sira hakat ba faze eliminasaun kuartus finais nuudar kampeaun grupu (A) ho pontus 7.
Enkuantu Canossa tenke hakat ba faze eliminasaun quartus fianais nuudar runner-up ho pontus 6 hosi jogu dala tolu manan rua no derota dala ida.
Iha jogu ne’ebe mak nuudar jogu determinante ne’e Nikolau Lobato ne’ebe mak antes ne’e iha pozisaun segundu klasifikasaun tun kedas ho ambisaun boot hodi lansa presaun makas ba Canossa.
Ho esforsu ne’ebe mak eskola Nikolau Lobato halo foin mak rezulta golu iha minutu 9 liu hosi Carlos Soares hodi lori nia ekipa lidera ho score 1-0.
Ho golu ne’e tenis jogu komesa manas liu tan no tama ba iha minutu 29 Carlos Soares hamorin hikas nia naran hodi lori nia ekipa lidera ho score 2-0.Ho score refere mantein to’o termina jogu primeira parte.
Tama iha segunda parte intensidade jogu komesa manas liu tan ba ekipa rua ne’e hodi lansa kontra atake ba malu no tama ba iha minutu 51 rede Canossa nakdoko hikas liu hosi asaun Savio Pires hodi muda aumenta score ba 3-0.
Golu terseiru hosi Carlos Soares foin akontese iha minutu 53 hodi lori kedas nia ekipa lidera ho score 4-0.
Festa golu Nikolau Lobato taka hosi jogador Joao Hornai iha minutu 55 hodi hatuur metin score ba 5-0.
JHD
