Dili– Selesaun Nasional Futsal Timor Leste sofre derota iha jogu dahuluk kontra adversariu uma nain Bahrain ho score mihis 1-0, iha jogu Kualifikasaun Piala Asia Futsal 2024, faze apuramentu pool (F).
Hala’o jogu iha Khalifa Sports City Hall, Manama, Bahrain, domingu (08/10/2023). Ne’e nuudar debuta dahuluk ba Treinador Fandy Butarbutar hamutuk ho selesaun nasional futsal Timor Leste iha jogu internasional.
Selnas Timor Leste konsege hatudu jogu ne’ebe berliante kontra Bahrain. Ekipa Bahrain ne’ebe mak okupa iha pozisaun 70 tuir renking mundial FIFA no mos iha pozisaun 15 iha Asia, no Timor Leste ne’ebe mak iha pozisaun 123 tuir renking mundial FIFA no pozisaun 33 iha Asia maibe konsge fo presaun makas ba ekipa adversariu Bahrain ne’ebe mak nuudar uma nain.
Iha inisiu jogu primeira parte ekipa rua selnas Timor Leste konsge fo presaun makas ba adversariu Bahrain maibe to’o termina jogu primeira parte score mantein okulista 0-0.
Iha segunda parte tensi jogu komesa manas liu tan ba ekipa rua ne’e hodi lansa kontra atake ba malu hodi buka oportunidade atu produs golu atu asegura pontus tolu.
No tama ba iha minutu 39 antes atu termina jogu segunda parte ekipa uma nain Bahrain konsge fura rede selnas futsal Timor Leste hafoin aproveita bola barullu iha kantu liu hosi jogador numeru kamizola 12 hodi hatuur score sa’i 1-0.
Hosi rezultadu vitoria ne’e hatuur ekipa uma nain Bahrain iha pozisaun daruak pool (F) ho pontus 3 hosi jogu dala ida.
Enkuantu Timor Leste iha pozisaun datoluk ho pontus 0 hosi jogu dala ida ne’ebe mak sofre derota.
Timor Leste rasik sei iha sei hala’o tan jogu dala rua kontra Kuwait iha loron 9 no kontra Brunei Darussalam iha loron 11 fulan ne’e.
JHD
