DILI–Mauputar Fc kontinua ho tren pozitivu iha jornada da-6 Liga Futsal Timor Leste epoka priemeira divizaun 2023-2024, hafoin manan nia adversariu AD Samoro ho score 6-2.
Duelo entre ekipa rua ne’e hala’o iha kampu F-FDTL fatuhada Dili Tersa (07/11/2023), Mauputar Fc ne’ebe lidera hela tabela klasifikasaun provizoriu tun kedas ho ambisaun boot hakarak Koileta Pontus 3 hodi kontinua ukun Liga Futsal Timor Leste priemeira divizaun refere no rezultadu jogu foin hala’o deit minutu 2 rede Ad Samoro nakdoko ona liu hosi asaun Bendito Ximenes hodi muda score sa’i 1-0.
Liu deit minutu 1 Bendito Ximenes marka tan nia naran hodi muda aumenta score sa’i 2-0 iha minutu minutu 3.
Tama ba iha minutu 10 makina golu Mauputar Fc Ruben Faria susesu amuenta golu ba Mauputar Fc sa’i 3-0.
AD Samoro foin responde golu ida iha minutu 11 liu hosi jogador Bernardo Vong hodi hamihis score sa’i 3-1.
No tama ba iha minutu 12 Bendito Ximenes marka tan golu ba dala tolu hodi muda aumenta score sa’i 4-1. Ho score refere mos mantein to’o termina jogu primeira parte.
Kontinua ba jogu segunda parte intensidade jogu sa’i manas liu tan maibe Mauputar Fc ne’ebe mak kontinua domina bola susesu fura tan rede AD Samoro hodi hasae score ba 5-1 liu hosi asaun Ruben Faria.
Makina golu Mauputar Fc Ruben Faria marka nia golu datoluk iha minutu 34 hodi lori nia ekipa lidera ho score 6-1.
AD Samoro foin responde tan golu ida iha minutu 38 liu hosi asaun Bernardo Vong hodi taka score 6-2 vitoria ba Mauputar Fc.
Hosi rezultadu vitoria ne’e hatuur metin ekipa Mauputar Fc iha pozisaun dahuluk liga futsal Timor Leste priemeira divizaun epoka 2023-2024 ho pontus 18 hosi jogu dala 6 manan hotu.
Enkuantu ekipa Ad samoro mantein iha pozisaun da-3 ho pontus 9 hosi jogu dala 6 manan tolu no derota dala tolu.
JHD
