DILI– Kampeaun Pra-Liga Futsal Timor Leste, Ramelau Fc, kontinua hatudu tren pozitivu iha jogu kontinuasaun Liga Futsal Timor Leste primeira divizaun jornada da-6 hafoin manan nia adversariu ho score 8-2.
Hala’o jogu iha kampu F-FDTL fatuhada Dili Tersa (07/11/2023), Desde inisiu jogu ekipa rua hotu hotu hatudu jogu ne’ebe diak hodi lansa kontra atake ba malu no tama ba iha minutu 4 Ramelau Fc susesu fura rede Gamer Fc liu hosi asaun Evinho Guterres hodi muda score sa’i 1-0.
Maibe score refere la dura to’o tempu naruk tanba tama ba iha minutu 5 Gamer Fc susesu responde kedas hodi halo balansu ba score sa’i 1-1, liu hosi makina golu Gamer Fc Alexandre da Cruz.
Ho golu ne’e Gamer Fc kontinua fo presaun makas ba Ramelau Fc no Ramelau Fc ne’ebe mak iha hela presaun nia laran difisil atu kore aan hosi presaun ne’ebe mak Gamer Fc halo.
Ramelau Fc ne’ebe mak hetan presaun makas konsege kore aan hodi lansa kontra atake ba Gamer Fc no rezultadu tama ba iha minutu 10 Evinho Guterres susesu marak tan nia naran hodi muda aumenta score sa’i 2-1.
Ho golu halo ekipa Ramelau Fc hasae liu tan ritmu jogu nune’e tama ba iha minutu 11 Luis Ferreira susesu produs tan golu ida hodi muda aumenta score ba 3-1 ho score refere mantein to’o termina jogu primeira parte.
Kontinua ba jogu segunda parte intensidade jogu komesa manas liu tan maibe Ramelau Fc ne’ebe mak kontinua halo rotasaun ba jogador nafatin fo presaun makas ba Gamer Fc ho nune’e iha jogu Suganda parte Ramelau Fc susesu produs tan golu lima liu hosi jogador Rivaldo Pereira (21), Jose da Costa (27), Joao Guterres (26), (37) Joel Fernandes (39).
Enkuantu ekipa Gamer Fc konsege responde deit golu ida iha minutu 35 liu hosi asaun Anito Fernandes ho nune’e to’o termina jogu segunda parte vitoria ba Ramelau Fc ho score 8-2.
Ho rezultadu vitoria ne’e hatuur nafatin ekipa Ramelau Fc iha pozisaun daruak ho pontus 18 hosi jogu dala 6 manan hotu.
Enkauntu ekipa Gamer Fc mantein iha pozisaun 4 ho pontus 9 hosi jogu dala -6 manan tolu no derota dala tolu.
JHD
