Dili– Federasaun Futebol Timor-Leste ( FFTL) deside adia jogu FFTL-Telkomsel Cup U-17 ho loron indeterminadu tanba la iha orsamentu.
Tuir sekretariu geral asosiasaun futebol Munispiu Viquque Rosito Soares, Torneo FFTL-Telkomsel Cup U-17 ne’e realiza tanba FFTL halo koperasaun ho Telkomcel entaun apoiu fundus hosi Telkomcel ho FFTL.
Jogu ne’e hala’o iha kada munisipiu, se mak juara iha munisipiu depois ba joga iha nivel rejional, hafoin hosi kada rejional mak representa klube rua (2).
Rosito explika, Telkomcel nia apoiu fundus ne mak uza ba apoiu jogus iha munisipiu to’o nivel rejional.
Nia informa jogu oitavo-finais mai fali iha nasionál ne’e orsamentu toma konta loos hosi FFTL tanba ida ne’e mak agora sira araska osan hodi horisehik kansela derepnti jogus oitavu-finais ne’e.
“Jogu oitavo-finais né tuir planu no bazeia ba oráriu sei realiza iha loron 8 novembro 2023, maibé derrepente de’it horisehik ami simu karta informasaun katak jogu refere sei adia ba data indeterminado ho razaun forsa orsamentu la to’o” hateten Secretario-Geral Asosiasaun Futeból Munisípiu Viqueque, Rosito Soares ba JHD via WhatsApp, tersa (07/11/2023).
“Ami hotu inklui jogadór sira senti desapontados tebes ho situasaun ne’e durante fulan hirak nia laran ami hala’o preparasaun máximu no jogadór sira 100% preparadu atu kompete, ikus mai rona novidades nune’e, psicologicamente afeita tebes ba jogadór sira” Secretario Geral hatutan
“Ami lamenta liután kuandu bainhira iha loron 25 Outubru FFTL konvida ekipa partisipantes ba tuir Technical-Meeting no dada sorteio oitavo-finais nian, sira fó sai katak jogu abertura oitavo-finais sei hala’o iha loron 8 fulan-Novembru 2023 entre FC Habam (Covalima) vs FC Airala (Manu-Fahi), maibé derrepenti de’it sira adia sein kordena ho ami maski ami lamenta tebes, maibé ami nafatin respeita no simu desijaun ne’e, no espera adiamento né sei la hamenus espíritu no morál ekipa nian” dehan Secretario-Geral Asosiasaun Futeból Munisípiu Viqueque né.
Entertantu iha faze oitavo-finais sei partisipa hosi klube walu (8) mak hanesan Academica – Baucau, Laloran – Viqueque, Assalam – Dili Weste, Emarui – Ermera, Umsal – Aileu, River Bolobu – Bobonaro, Habam – Covalima, Airala – Manufahi.
JHD
