DILI – Ekipa Futeból Femenino Maudoko Fc susesu fila fali ba priemeira divizaun hafoin sa’i kampeun ba Liga futebol Femenino segunda divizaun epoka 2023.
Maudoko Fc susesu sa’i kampeun hafoin koileta pontus 24 hosi jogu dala 8 ne’ebe mak sira hala’o.
Klubu ne’ebe mak komanda hosi treinador Timoroan Jeca Sarmento, ho nia asistente treinador Daniel Appiah hosi nasioanlidade Ganha ne’e mos susesu hatudu produtividade golu ne’ebe mak exelente tanba konsge produs golu hamutuk 89 no konsege hadau mos mellor markador liu hosi Nilda Romana ho total golu hamutuk 30.
Antes ne’e ekipa Maudoko Fc iha priemeira divizaun iha tinan 2019 maibe iha tinan 2020 ekipa Maudoko Fc degrada ba segunda divizaun. Hafoin tinan rua (2) iha divizaun segundu, ekipa Maudoko Fc konsege fila hikas ba primeira divizaun.
Iha entervista ho treinador prinsipal Maudoko Fc, Jeca Sarmento, hatete, hafoin hetan konfiansa hosi superior Maudoko Fc nuudar treinador prinsipal ba klubu Maudoko Fc nia sente ne’e servisu ne’ebe mak todan ba nia tanba treinu jogador femenina maibe ho esforsu ne’ebe mak sira halo susesu hetan rezultadu pozitivu hodi sa’i kampeun.
“Konaba jogu kampeun laos ha’u sente puas ona maibe ne’e hanesan inisiu ida ne’ebe ha’u husu ba sira kontinua aprende barak liu tan tanba primeira divizaun laos fasil hanesan segundu divizaun” informa treinador Jeca Sarmento ba jornalista sira iha edifisiu Maudoko Fc delta un Dili, Segunda (05/02/2023).
“Ha’u fo buat ne’ebe mak ha’u aprende barak konaba finishing liu-liu ba avansadu sira no mos ha’u koalia ba sira kuandu ita hetan oportunidade tenke aproveita halo hodi halo golu” Nia explika.
Treinador ne’e mos rekonese katak nia ekipa sei falla iha buat barak tanba ne’e sira sei esforsu hodi servisu makas liu tan liu liu iha kontrolu passing no fizikamente ne’ebe mak sei menus.
“Neebe ha’u hanoin antes ba tama ba priemeira divizaun hahu ami sei hadia sira nia fiziku no kontrolu no hau mos hato’o ona prezidente atu aumenta tan jogador estranjeiru balu no aumenta mos jogador lokal hodi haforsa ekipa” nia informa.
Iha fatin hanesan prezidente klubu Maudoko Fc, Taquino Soares, espresa Sentimentu kontente epoka ne’e nia klubu konsege fila fali ba priemeira divizaun.
Nia afirma, tanba jogu priemeira divizaun ho tensi ne’ebe mak aas nune’e nia prontu atu rekruta jogador estranjeiru molok hodi bele kompete iha priemeira divizaun.
“Ba priemeira divizaun ha’u sempre koalia ho treinador hodi perpara halo diak liu tan no aumenta jogador estranjeiru ida rua hodi haforsa jogador agora” nia informa.
Taquino informa, dadaun ne’e Maudoko Fc iha jogador hamutuk 18 inklui jogador estranjeiru ida.
JHD
