Dili–Atual Prezidente Asosiasaun Arbitrajen Futeból Timor Leste (AAF-TL) Nivio Fernandes konsidera prezidente sesante Aniceto Berlelo ilegal.
Atual Prezidente AAF-TL deklara asuntu ne’e relasiona ho deklarasaun hosi prezidente sesante Aniceto Berlelo ne’ebe mak konsidera katak kongresu AAF-TL ne’ebe mak hala’o iha loron 20 fulan janeiru foin lalais ne’e ilegal no nia mak iha diretu atu vota iha ultimu kongresu FFTL.
“Ita koalia konaba diretu de votu ne’e estrutura ne’ebe foin hetan fiar hosi kongresista sira ne’e sira mak iha diretu votus, laos prezidente agora nia koalia dehan kongresu foin dadauk ne’e ilegal, justru nia (red Aniceto Berlelo)mak ilegal, agora laos ita mak ilegal ita hetan fiar hosi kongresista sira reprezenta hosi Kordenador arbitrajen 13 munispiu ne’ebe koalia loolos ne’e nia mak ilegal laos ita mak ilegal” dehan atual prezidente AAF-TL Nivio Fernandes ba jornalista sira iha edifisiu FFTL Tersa (30/01).
Nia deklara, konserteza prezidente sesante Aniceto Berlelo la iha diretu atu koalia ona, ne’e koalia konaba lejitimidade tanba kongresu hili tiha ona deside ona prezidente foun no extrutura foun.
“Ne’e ita koalia lejitimidade tanba hili hosi kongresu agora se nia koalia nafatin iha kotuk ne’e prontu ha’u hosik deit nia hakarak koalia to’o iha ne’ebe konforme nia koalia deit mais lejitimidade iha ita nia liman” deklara ataul prezidente AAF-TL ne’e
“Nia dehan kongresu ilegal ha’u sente katak ema ne’e ha’u la hatene Ema ne’e komik oituan, tanba hanesan ne’e primeiru esta ita hakarak koalia sobre ba prezidente nia disponibilidade, Hanesan ne’e primeiru nia hatete katak prontu atu mai para atu bele tuir kompete hotu iha kongresu foin dadauk ne’e no nia rasik mai to’o iha Federasaun, ami rua hasoru malu no nia simu konvite duni direta hosi ha’u no nia halo tanda terima iha kompletu depois ho ida ne’e nia fila fali ba ha’u la hatene tanba saida derepente deit nia la mai no halo fali entervista mos nia hatete katak ne’e ilegal” Nivio Haktuir.
Nia afirma, Lejitimidade ne’e asembleia kongresista sira mak determina lolos ne’ebe Ema hotu lao tuir nia dalan.
“Ita koalia sobre nia dehan tenke hetan karta hosi FFTL loos ita iha kompletu ne’e ita iha karta hosi autotizasaun FFTL atu bele halo kongressu ita iha karta kompletu no ita hetan autotizasaun mak ita hodi lao” dehan Fernandes.
Nia explika, Mandatu prezidente sesante Aniceto Berlelo Nian ne’e remata ona iha loron 3 marsu 2023 no kuaze besik tinan ida ona.
Nia uza nia outorita ida ne’e para nia hakarak uza nafatin arbitrajen ne’e atu sa’i nia instrumentu ne’e labele akontese
“Tanba ne’e mak hamosu inisistiva ida katak ita bele halo kongressu ita bolu se Nia la kopera ita atu husik tuir nia hakarak nia pesoal ida deit mezmu nia bele prezidente mais nia ema ida deit nia labele kontra ema barak” tenik nia
“Agora dadauk ita boot sira haree nia hamrik mesak arbitu hotu hotu iha ita nia kotuk ne’ebe lejitimidade ne’e iha Ita nia parte laos nia” nia afirma.
Antes ne’e mosu dualismu ka disputa diretu votu iha kongresu FFTL bá dala IX nune’e iha loron 20 fulan janeiru ne’e asosiasaun arbitrajen Futebol Timor-Leste hala’o ona kongresu hodi hili prezidente foun
No iha kongresu AAF-TL ne’ebe mak refere Nivio da C. Fernandes, mak eleitu ba prezidente AAF-TL ho votus aklamasaun no vise prezidente, Jaime Gonsalves, Sekretariu jeral Vital Saldanha, vise sekretariu jeral, Lorenco Guterres, ba pozisaun Tezoreiru Mak Cancio Gusmao.
JHD
