Dili-14/11/021, Lalenok United Fc hahu Liga Timorense epoka 2021 – 2022 ho Vitoria kontra Assalam Fc ne’ebe akontese iha Estadio Munisipal Dili.
Jogu hahu ho ritmu moris, iha ne’ebe Lalenok United Fc domina bola hodi kaer inisiativa ba lansa atake. Tama ba minutu 3, Lalenok Fc hetan opurtunidade hodi suta kantu ne’ebe Santiogo da Costa numeru kamizola 9 konsege komverte sai golu, score 1 -0.
Ho golu refere halo jogu kompetetivu liutan, klube rua apresenta kontra – atake ida lais. Iha minutu 13, Assalam Fc mak hetan opurtunidade hodi halo empata liuhosi asaun Bonarudin Amin ho numeru kamizola 17 ne’ebe lansa suta husi dook ne’ebe guarda rede la konsege salva, 1 – 1.
Score proovizoriu ida ne’e hamoris atmosfera iha Estadio Munisipal Dili. Kada amante haklalak hodi hasae mentalidade jogador ida-idak nian.
Tama ba minutu 7 ikus husi primeira parte. Lalenok United Fc lidera fila fali liuhosi servisu hamutuk entre Pedro Vicente ho numeru kamizola 3 ne’ebe hatama bola ba Daniel Adade numeru kamizola 11 hodi suta halo rede fura guarda rede Assalam Fc iha minutu 38, score 2 – 1.
Lalenok United nia kontente la augenta ba tempu naruk. Liu de’it minutu 2, Assalam Fc lansa atake husi ain ba ain hodi kruza bola tama ba area defeza Lalenok Unitede nian ne’ebe Hasan Costa ho numeru 7 simu ho kabesa hodi marka golu iha minutu 40, score 2 – 2. Score refere augenta to primeira parte termina.
Jogu segunda parte, hahu ho superioridade Lalenok United Fc nia. Hodi domina jogu no kaer inisiativa atake barak. Nune’e, Tama ba minutu 50 maka Danilson Araujo numeru kamizola 26 lori Lalenok United Fc lidera liuhosi suta makas hodi fura rede Assalam Fc nian ba dala – 3, score 3 – 2.
Lalenok United Fc kontinua domina jogu hodi kria tentativa oin – oin hodi tama ba area defeza adversariu nian. ikus mai, Daniel Adade konsege hatama tan Nia golu daruak iha enkontru refere liuhosi nia asaun iha minutu 78, socre 4 – 2.
Maibe na realidade ekipa Lalenok Utd nafatin la fo tempu ba ekipa refere, halo jogador numeru kamizola 11 Daniel Adade hatama tan golu iha minutus ikus 78 Skore 4-2. Tenke halo jogadores Assalam Fc lakon jogu husi lalenok Utd Fc.
Tuir treinador husi klubu Lalenok Utd Fc Gaspar Amaral, “Sente kontente ho rekolla primeira golu ho pontus tres, to’o iha ne ha’u seidauk satisfaz no la kontente ho sira nia performab, maske jogador sira aplika treinamentu sira iha kampu, ida ne seidauk to’o. Kona ba vitoria ami sente kontente no ba oin ami seidauk hadi’a diak liu ida ne’e”.
Tuir Treinador husi Ekipa Assalam Fc Adu Marquea hateten, “iha jogu ba segundu parte nian falla iha fiziku tenke halo ami lakon ho 4-2, maske durante nee iha preparasaun masimu. Iha Ami nia ekipa ami hatun jogador husi estranjeiru nain lima (5), maibe nain tolu (3) mak ohin tun kampu, baliza ida, defesa rua. Sira jogu la dun diak tamba seidauk halo adaptasaun ba ita nia jogadores no kampu futebol nee”.
Lalenok United Fc: Gaspar Amaral; Fagio Pereira, Francisco da Costa, Hermenio de Sousa, Santiago da Costa, Zacarias Cabral, Daniel Adade, Italo Pimentel, Osorio Gusmao, Abrao Mendonca, Danilson Araujo, Pedro Vicente.
Assalam Fc: Adu Marques; Wahyu Pratama, Hasan Costa, Almerito da Silva, Armando Varela, Sandro Quintao, Husen Costa, Helder Valente, Andrew Budiomo, Martinho Belo, Bonarudin Amin, Emmanuel Tunnu.
Reportajen: Putri
