Dili-17/11/2021, S’Amuser hakat ba semi – final hafoin hetan Vitoria iha enkontru kontra Maudoko Fc iha Kampo Demokrasia.
Jogu hahu ho intensidade as hodi apresente kontra atake entre klube rua. S’Amuser organiza atake no defeza diak tebes hodi fo presaun sen bola ba jogador Maudoko Fc. Nune’e, iha minutu balun de’it, Dolores Silva Costa numeru kamizola 7 hadau bola husi jogador adversariu hodi pasa bola ba Fernanda Juniro, nune’e lansa suta ne’ebe as liu tia.
Tama ba minutu 9, Dolores Silva loke tabela score liuhosi asaun lori bola tama ba area defeza adversariu, hodi kria suta ne’ebe guarda rede la konsege salva, score 0 – 1. Iha minutu tuir mai Dolores Silva besik atu haluan espasu score liuhosi servisu hamutuk ho Amina dos Santos ne’ebe guarda rede konsege salva.
Ho jogador S’Amaser nia disiplinasahn hodi kontrola no pressing ne’ebe diak halo jogador Maudoko Fc sempre lakon bola. nune’e, minutu 19 Dolores Silva konsege manan bola husi jogador adversariu hodi marka tan golu ba dala-2, score 0 – 2.
Ho jogu ne’ebe kapas no disiplinadu iha domina no kria atake ne’ebe apresenta husi S’Amuser anima tebes amante iha Kampo Demokrasia. Nune’e, sira nafatin kaer inisiativa hodi tenta lansa atake ba Maudoko Fc nia area defeza to’o primeira parte termina.
Iha Segunda parte, S’Amuser nafatin apresenta Nia superiodade kontra Maudoko Fc, hodi domina bola no kaer inisiativa ba lansa atake. Tama ba minutu 48, Dolores da Silva marka tan golu ba dala-3 liuhosi Nia asaun ne’ebe guarda rede la konsege antisipa, score 0 – 3.
Lakon Golu 3 husi S’Amuser, Maudoko Fc tenta halo mudansa ba sira-nia joga hodi aplika presaun ba jogador S’Amuser bainhira sira kaer bola. Maske nune’e, nafatin laiha komunikasaun diak entre jogador Maudoko Fc hodi la konsege blokeiu S’Amuser nia jogu husi ain ba ain.
Tama ba minutu 50, Liticia Rego ho numeru kamizola 20 haluan Liu tan espasu golu liuhosi nia asaun ne’ebe finaliza ho suta hodi marka golu, score 0-4.
Minutu tuir mai, S’Amuser nafatin lansa atake ba area defeza adversariu ne’ebe konsege destrui konsentrasaun jogador nian, nune’e iha minutu 57 S’Amuser nia atake konsege resulta penalti bainhira bola Kona jogador Maudoko Fc nia liman. Dolores Silva ne’ebe sai ezekutor la konsege aproveita opurtunidade ne’e ho diak, hodi suta bola ba diresaun ne’ebe guarda rede Maudoko espekta.
Molok termina enkontru, maka Maudoko Fc konsege halo balansu ba jogu, hodi tenta kria atake ba S’Amuser nia area defeza. Nune’e to enkontru termina la akontese tan golu ruma, score 0 – 4 ba S’Amuser nia Vitoria.
Ho resultadu refere, S’Amuser sei koko forsa kontra Buibere Fc iha semi – final iha loron 01 / 12 iha tinan ne’e. Enkuantu Maudoko Fc eleminadu husi Taxa Rosa “Muki” Bonaparte.
Reportajen: Lidia
