Dili-16/11/2021, Taca Rosa Muki Bonaparte epoka 2021 hahu enkontru entre Buibere FC Kontra VDL Fc iha Kampo Demokrasia.
Jogu lao ho tempu maten, iha ne’ebe Buibere Fc domina bola hodi kaer inisiativa ba lansa atake husi ain – ain. Nune’e, iha minutu 12 mak Buibere Fc foin bele loke tabela score liuhosi asaun Marcia Chaves ho numeru kamizola 17 ne’ebe suta hodi marka Golu, score 1 – 0.
Liu deit minutu 4, Buibere Fc konsege domina fali bola hodi lansa atake ne’ebe fo opurtunidade ba Marcia Chaves hodi Marka Golu ba daruak, score 2 – 0.
Minutu tuir mai, VDL Fc tenta halo balansu ba jogu liuhosi atake dala-hira ne’ebe sira kria. Maske nune’e, efetevidade jogu nafatin Buibere Fc ne’ebe aproveita didiak sira atake hodi haluan liutan espasu golu liuhosi Femania Babo ho numeru kamizola 16 Mak suta bola ne’ebe guarda rede sala antisipa, score 3 – 0.
Ho Buibere Fc nia superioridade hodi halo jogu husi ain ba ain, hodi kontrola no orienta jogu halo jogador VDL sai frazil ba komete falta. Nune’e, tempu primeira parte besik remata jogador Buibere Fc ne’ebe lori bola tama ba area adversariu nian ne’ebe ikus mai lakonsege remata tan hetan tesi husi jogador VDL, tan ne’e arbitu fo penalti Iha minutu 40. Nune’e, Nilda Romana la Soe opurtunidade ne’e hodi finaliza penalidade ho golu, score 4 – 0.
Iha Segunda parte, Buibere Fc kontinua domina jogu hodi kaer inisiativa atake no efetivu. Nune’e, iha minutu 49 Macia Chaves konsege hatrick, score 5 – 0. Tama ba minutu 69 Nilda Romana hetan opurtunidade hodi marka golu ba daruak nian iha enkontru refere, score 6 – 0.
Tama ba minutu 73, Tania Soares mos lakoi lakon hodi partisipa iha festa golu kontra VDL, aproveita simu bola area adversariu hodi kria kedan suta ne’ebe guarda rede lakonsege antisipa, score 7 – 0.
Tan labele halo balansu ba Buibere Fc nia jogu maka iha minutu tuir mai VDL halo mudansa ba jogu hodi bele lansa atake ruma ba Buibere Fc nia area. Nune’e, iha minutu 79 Natacia Pereira konsege aproveita atake hodi komverte sai golu, score 7 – 1.
Liu de’it minutu ida, Buibere responde kedan ho Golu husi Monica Seixas iha minutu 80, score 8 – 1. To termina enkontru la akontese tan golu ruma, score nafatin.
Ho Vitoria refere, Buibere Fc ultrapasa ba faze seminal hodi hein kampeaun husi enkontru Maudoko Fc kontra S’Amuser ne’ebe sei akontese iha loron 17/11/2021, tuku 15 : 30 Otl iha Kampo Demokrasia.
Reportajen: Lidia
