Dili-18/11/2021, Federasaun Desportu Akademiku Timor Leste (FDA – TL) realiza Festival Desportu Akademiku Timor Leste (FESDATIL) 2021 ho Tema ” Promove fiziku saudavel, kakutak katenek, liman – ain badaen no neon badinas ” iha resintu Sekretariu Estadu Joventude Desportu (SEJD).
FESDATIL ne’e akontese ho objetivu hametin unidade, toleransia, no amizade entre universitariu sira liuhosi modalidade deportu hanesan ; Futebol, Volibol, Xadres, Taekwondo no Atletismu. Nomos selesiona atleta hodi ba partisipa ASEAN UNIVERSITY GAMES iha tinan oin ne’ebe realiza iha Thalandia.
Ho modalidade hirak ne’e maka FESDATIL sei realiza iha fatin 3, hanesan ; Kampo SEJD, Estadio Munisipal Dili no Kampo Federasaun Futebol Timor – Leste, durante semana ida. ho nune’e sei apoiu mos husi federasaun ba kada modalidade.
Tuir Presidente FDA-TL, Zeferino Viegas Tilman hateten “FESDATIL ne’e atu fo espasu no biban ba atleta Universitariu sira atu kompete hodi nune’e sira bele expresa, liu-liu talenta ne’ebé mak durante tinan ida ou rua lia ba la konsege expresa”
” Timor – Leste iha Intitutu superior 18, enkuantu instutu 16 mak partisipa no seluk la partisipa tan kestaun preparasaun no kestaun kustu ba transporte jogador ho numeru bo’ot mai Dili”. Haktuir Presidente FDA-TL.
Nune’e, tuir Sekretariu Estadu Joventude Desportu Eng. Abrao Saldanha Nokosiku hateten ” atleta sira tenki sai Liman no ain ba futuru, nune’e bele sai hanesan formador ba atleta sira tuir mai.
Entretantu tuir Magnifiku Reitor Unital Florindu Pereira iha nia entrevista hateten, “husu ba Universitariu sira ka estudante sira bele mai partisipa iha kompetisaun ou eventus ida nee, atu nune’e bele hatudu sira nia talentu hodi bele selesiona manan nain sira iha futuru, nune’e bele lori Timor ba mundu bele mos halo kompetisaun iha rai li’ur”.
FESDATIL hala’o ona ba dala-5, hahu husi 2015, 2016, 2017, 2018 no 2021, iha ne’ebe hetan partisipasaun masimu husi husi estudante universitariu husi institutu superior hanesan, DIT, ETCI, ISC, ICR, IOB, IPDC, ICS, IPB, ISFIT, IFFS, ISJB, JSU, UNPAZ, UNTL, UNITAL, UNDIL.
Reportajen: Lidia & Putri
