Dili-19/11/2021, As. Ponta Leste konsege rekolla pontu masimu kontra DIT Fc iha enkontru semana daruak.
Jogu hahu ho ritmu maten, tan AS. Ponta Leste halo jogu husi ain – ain hodi buka meius hodi lansa atake ba area defeza DIT Fc nian. Nune’e durante minutu 30 dahuluk As Ponta Leste la konsege kria shoot on target ruma.
Maske ladun domina bola, DIT Fc iha atake ne’ebe konsege halo baralla AS. Ponta Leste, liuhosi opurtunidade ne’ebe Sewor Mahuse ho numeru kamizola 9 konsege hetan bola bainhira As. Ponta Leste nia guarda rede laiha Fatin hodi suta as liu ring.
Iha minutu hira tuir mai, ekipa rua tenta halimar iha jona seguru, jogu bola husi ain – ain. Nune’e, la akontese atake periguju ruma.
Hafoin iha minuutu 45, Ricardo Bianco konsege hetan bola iha area defeza DIT Fc nian ne’ebe finaliza ho shoot ne’ebe guarda rede la konsege antisipa, score 1 – 0.
Iha segundu parte, DIT Fc konsege halo balansu ba jogu, nune’e sira mak domina bola hodi kaer inisiativa ba atake. Maske nune’e atake hira ne’e hotu lakonsege ameasa rede As. Ponta Leste tan Off side.
Ho ritmu jogu ne’ebe maten, ekipa rua la konsege anima amante iha Estadio Munisipal Dili. Nune’e, ladun akontese kontra – atake durante enkontru. To tempu segunda parte termina la akontese golu ruma, As. Ponta Leste lidera ho score 1 – 0.
Tuir Treinador DIT Fc Alexandre Cham iha nia entrevista hatete, ” la espera ho jogador estranjeiru nain rua ne’ebe hatudu performan la dun masimu maske prepara ona sira ho kondisaun diak“.
Enkuantu tuir treinador Francisco De Araujo deklara, “iha jogu nee nia laran ekipa sira tenta atu ultrapassa dezafius sira husi ekipa adversariu DIT Fc. Ba jogu ida ohin nee ami domina tebes bola, konsege iha shoot tolu maibe marka golu 1 deit, ho falla hirak nee ba oin ami sei hadia no ida nee hanesan ezersisiu ida ne’ebe tenke ba ekipa tuir mai“
Reportajen: Putri & Lidia
