Dili – Treinadór Selesaun Nasional, Fábio Macial da Silva hateten, maske ita nia ekipa mais joven, maibé nia iha esperansa boot ba ekipa atu bele hatudu jogu diak iha SUZUKI CUP 2020.
“ita iha ekipa mais joven, ha’u iha esperansa boot ba ekipa ida ne’e para halo SUZUKI CUP 2020 ida diak. Mesmu ke sira sei enfrenta adversáriu difisíl, mas ha’u iha esperansa boot ba ekipa tanbá sira mesak joven, entende modelu ne’ebé sira hakarak apresenta, no treina hamutuk iha tempu naruk”. dehan Treinadór Selesaun Nasionál, Fábio Macial da Silva ba média nasionál sira liu husi zoom iha edifisiu FFTL, tersa feira (30/11/2021).
Nia esplika, maske ekipa Lafaek ladun esperiente iha enkontru internasionál no ekipa mesak joven, maibé iha serteja atu sira apresenta jogu diak iha SUZUKI CUP 2020.
“Klaru katak falta jogu internasionais para manan esperiensia, ekipa mesak joven mas ha’u iha serteja atu halo apresentasaun diak iha SUZUKI CUP 2020”. Nia haklean.
Ekipa Selesaun Nasionál iha preparasaun ida diak. Tan sira preparadu iha aspeitu mentalidade, fizika, no modelu jogu no kualker koiza, hodi enfrenta kualker ekipa diak no forte.
“Ema hotu hatene, Ita sei enfrenta ekipa diak no ekipa forte tebes, mas agora ita nia ekipa Preparadu. Preparadu mentalmente, preparadu fizikamente, modelu jogu no kualker koiza”, Fabio subliña.
Enkuantu, Ekipa Selesaun Naionál hamutuk iha grupu A. hamutuk ho Nasaun 4 seluk hanesan, Thaland, Myanmar, Philippines no Singapure.
Horariu jogu Iha jogu dahuluk ekipa Selesaun Nasionál Timor Leste sei hasoru Tailandia iha 5 dezembru, no jogu tuir mai Myanmar iha 8 dezembru, hasoru Philippines iha 11 dezembru no hasoru Singapure iha 14 dezembru.
Rep.: CharllY
