Dili- Kinta (01/12/2021), Ekipa S’Amuser susesu hakat ba Final Taça Rosa Muki Bonaparte hafoin halakon nia ekipa adversariu Buibere Fc nudar Kampiaun Taça Rosa “Muki” Bonaparte 2020 liu husi marka Penalidade ho score 3-2.
Duelo entre ekipa S’Amuser kontra Buibere ne’e hala’o iha Kampu Demokrasia Dili Ohin, Inisiu primeira jogu Klubu rua ne’e lansa kedas kontra atake ba malu, maibé ida-idak kontrola bola ho di’ak no la fó fatin atu Klubu ida bele marka uluk golu ba dahuluk.
Enkuantu Klubu Buibere esforsu an domina bola iha primeira jogu hodi halo atake makas ba iha jogador S’Amuser nia no fó amiasa ba iha rede S’Amuser nia maibé Jogador husi S’Amuser la fó oportunidade atu marka golu.
Husi Ne’e Klubu Buibere lansa presaun makas ba S’Amuser atu produz golu maibé la konsege tanba jogadores husi Klubu Buibere suta ho maneira ne’ebé fasil ba Guarda rede atu salva.
Husi ne’e suportasaun husi Klubu ida-idak nia halo barulho iha li’ur tanto treinador mós nafatin motiva nia jogador sira iha campo laran maibé treinador husi Buibere Fc simu kartaun kinur husi Arbitu tanba hakilar makas no hasai liafuan ne’ebá ladún diak ba arbitu.
Jogu kontinua la’o maske klubu Buibere tenta bebeik rede Adversáriu maibé baliza hamate hela de’it bola nune’e S’Amuser Fc nafatin mantem sira nia pozisaun, la fo tempu ba sira nia adversariu Buibere Fc atu manan sira. Nune’e jogu kontinua la’o to primeira termina la iha golu ruma mak akontese no score mantein okulista 0-0.
Kontinua ba jogu Segunda parte, Klubu S’Amuser reorganiza fali tatika jogu hodi kontra atake ba malu, haree ba estratejia jogu entre Klubu rua ne’e esforsu an hotu no hatudu stilos jogu di’ak tebes.
Nune’e hare ba iha Segundu jogu entre Klubu rua ne’e hatudu ho ritmu jogu ne’ebé hanesan hodi pasa bola ba malu husi ain ba ain ho maneira ne’ebé di’ak tebes .
Iha minutu balun Buibere Fc hetan oportunidade husi bola falta deside suta husi Jogador númeru kamizola 8 suta maibé seidauk kona tarjetu.
Ho Motivasaun ne’e Klubu S’Amuser halo mudansa ba nia jogador hodi troka númeru kamizola 9 tama númeru kamizola 3, hodi halo mudansa ba tatika jogu husi S’Amuser esforsu an liu husi Jogador númeru kamizola 7 fo amiasa tan ba rede Adversáriu maibé konsege salva husi Guarda rede.
Husi ne’e halo intesidade jogu alta liu tan,Jogador sira atake malu ho maneira oioin. Maibe entre Klubu rua ne’e defeza metin la fasil ba jogador sira atu hakat liu liña defeza, ho nune’e to’o termina jogu eskor mantein 0-0.
Husi rezolusaun empata ne’e ekipa rua tenke hakat ba hodi suta Penalidade, Entre Klubu rua ne’e delega nia jogador nain lima hodi suta penalti akonpanha husi Jogador refere iha kampo laran.
Husi Klubu Buibere Fc delaga Jogador nain lima mak hanesan; 13-Nilda Romana, 16-Femania Babo, 28-Tachya Duarte, 17-Marchia Chaves, 8-Locelia Fernandes.
Enkuantu Klubu S’Amuser mak Jogador; 7-Dolores V. S. Costa, 8-Rosa da Costa, 4-Maria da Conceiccao, 13-Leticia da C. E. Soares, 2-Adelaide Carvalho.
Iha Penalidade ne’e husi Klubu S’Amuser jogador nain tolu Dolores V. S. Costa, Rosa da Costa no Leticia da C. E. Soares susesu produs golu no na’in rua lae.
Enkuantu iha oportunidade liu husi penalti ne’e Klubu Buibere fc jogador nain rua Femani Babo no Tachya Duarte Sucesu produs golu no nain tolu faila tanba salva husi Guarda rede S’Amuser nia.
Husi rezultadu Penalidade ekipa S’Amuser mak manán nia ekipa adversariu Buibere Fc ho score 3-2, ho nune’e ekipa S’Amuser hakat ba Final Taça Rosa “Muki” Bonaparte.
Entertantu ekipa Buibere Fc obrigadu tenke para de’it iha Meus Finais tanba iha jogu Taça Copa Rosa “Muki Bonaparte ne’e sistema bota fora ka lakon sai.
Rep.: Lidia & Putri
