DILI – Buibere Fc sai terseiru Lugar ba Taça Rosa Muki Bonaparte 2021 hafoin manán Maranatha Fc liu husi Drama suta Penalidade ho score 5-3. Hafoin termina jogu ho score 1-1, iha tempu normal.
Jogu entre Buibere Fc kontra Maranatha Fc mak enkontru hodi hadau malun atu okupa 30 lugar iha eventu Taça Rosa Muki Bonaparte, mak hala’o iha kampu Demokrasia Dili tersa (14/12/2021).
Jogu hahú ho ritmu aas desde inisiu maibé defensivu husi kada ekipa mantein ho disiplina jogu ho nune’e la konsege produs golu. Tama ba iha minutu 25 Buibere Fc troka kedas nia jogador Agostina Soka sai hodi hatama Fernanda da Costa hodi halo mudansa ba tatika.
Tanbá seidauk hetan ritmu jogu, Klubu Kampeaun Liga feto no Tasa Rosa tinan kotuk ne’e kontinua troka tan nia Jogador iha minutu 30, maske nune’e la iha golu ruma mak akontese to’o termina jogu primeira parte score mantein okulista 0-0.
Kontinua ba jogu segunda parte klubu Buibere Fc ne’ebé mak halo mudansa ba tatika liu husi subtituisaun ba jogador ne’e susesu fo rezultadu pozetivu hafoin Femania Babo susesu fura rede Maranatha Fc ne’ebé mak hein husi Aqueda Ximenes hodi muda score ba 1-0.
Sofre ona golu ida Maranatha Fc hahú kore aan no sai husi presaun Buibere Fc, ho nune’e tama ba iha minutu 75 Maranatha Fc responde hikas golu ida hodi hatuur score ba 1-1 liu husi nia Avansadu Agia Isabel Bria. Avansadu ho númeru kamizola 27 ne’e marka golu hafoin hatudu nia asaun hodi ultrapasa ba defeza Buibere hodi lansa suta ne’ebé muda score.
Jogu kontinua ho ritmu natoon, ekipa rua tenta atu la lansa atake ruma. Nune’e, to termina jogu score kontinua 1 – 1.
Ho resultadu nune’e, ekipa rua tenki kontinua ba drama penalidade nu’udár meius ikus hodi hetan terseiru no kuartu lugar. Iha drama penalidade ne’e, Buibere Fc lidera scor ho 4 – 3 bainhira ezekutor ba dala-4 husi Maranatha Fc suta as liu. Ho nune’e, drama penalidade nia tensaun as liu bainhira ezekutor ba dali-5 Buibere Fc nian konsege marka golu. Ho nune’e, Buibere Fc konsege manan ho score 5 – 3.
Ho resultadu refere, Buibere Fc okupa Terseiru Lugar, enkuantu Maranatha okupa kuartu lugar.
Rep.: CharllY
