Dili – Maske joga de’it ho na’in 10 DIT Fc konsege manán nia ekipa adversariu Aitana Fc ho score 3-2 iha jogu kontinuasaun Liga Futebool Timor-Leste (LFTL) Primeira divizaun jornada da-lima epoka 2021, ne’ebé mak hala’o iha Estadion Munisipal Dili sexta (17/12/2021).
Duelo entre Armada Ajuleiro kontra Aitana Fc ne’e hahú jogu ho agresivu desde kick off Primeira parte no ekipa ruz fo presaun ba malu liu husi kontra no ataka ba malu.
No tama ba iha minutu 17 DIT Fc lídera kedas ho score 1-0 hafoin Venceslau Fatima susesu fura rede Aitana Fc ne’ebé mak hein husi Yusak Redjauw.
Sofre ona golu ida halo ekipa Aitana Fc tenta lansa kontra ataka ba DIT Fc maibé esforsu sira ne’e sei trava nafatin husi defensivu DIT Fc ne’ebé mak solidu.
Tama ba iha minutu 37 Aitana Fc sofre tan golu ida hafoin Ruben Borges susesu fura rede Aitana Fc liu husi suta ho distansia dook no guarda rede Yusak la konsege salva ho núne’e score muda aan ba 2-0.
Lidera ho score 2-0 halo ekipa Aitana Fc lakon kontrolu no DIT Fc aproveita ho mantein ho sira nia ritmu joga hodi halo atake ba Aitana Fc liu husi, tatika ain ba ain no tama ba iha minutu 45+2 DIT Fc fura tan rede Aitana Fc liu husi jogador Venceslau Fatima.
Golu segundu husi Venceslau ne’e akontese hafoin defeza husi Aitana lakon kontrolu no Venceslau Fatima aproveita ultrapasa ba defeza Aitana hodi marka golu hodi hatuur score ba 3-0, ho score ne’e mantein to’o termina jogu primeira parte.
Kontinua ba jogu segunda parte ekipa rua ne’e mantein lansa kontra no ataka ba malu maibé Aitana Fc ne’ebé mak sofre uluk ona golu tolu konsege halo mudansa ba tatika ho nune’e tama ba iha minutu 63 Aitana Fc konsege marka golu ida hodi hamihis score ba 3-1 liu husi jogador Francyatma Ima Kefy.
Eis jogador Boavista Fc no Assalam Fc ne’e marka golu ne’e hafoin hetan bola baruilu iha rede Aitana nian no defaza la kontrola ho di’ak ho núne’e Kefy aproveita hodi marka golu.
Aitana Fc kontinua domina bola hodi halo kontra no ataka no tama ba iha minutu 72 Edit Savio susesu fura rede DIT Fc hodi hamihis score ba 3-2.
Eis jogador Boavista Fc no Assalam Fc ne’e halo golu hafoin hetan bola baruilu iha area Aitana hafoin Edit Savio halo golu.
Aitana kontinua domina bola no tama ba iha minutu 84 DIT Fc tenke joga de’it ho na’in 10 hafoin Dino Amaral hetan kartun mean.
Menus jogador ida Aitana Fc tenta atu marka tan golu maibé la iha golu ruma mak akontese to’o termina jogu segunda parte vitória ba DIT Fc.
Husi rezultadu vitória ne’e la muda pozisaun DIT Fc no mantein iha jona mean ho pontus 3 maibé Dit Fc iha oportunidade boot para sai husi jona mean karik iha jogu sira hetan tan vitória.
Enkuantu Aitana Fc mós mantein okupa iha 6 klasifikasaun provizoriu ho pontus 4 husi joga dala 5 derota dala 3 manán dala 1 no empata dala 1.
DIT Fc : Ricardo Nunes, Feliciano Gonsalves, Pedro da Silva, Ruben Borges, Venceslau Fatima, Ervinho Soares, Dino Amaral, Edivaldo Castro, Bonaventura Klau, José Almeida, António Boavida.
Aitana Fc: Yusak Redjauw, josehp Koami, Jaimito Soares, Lamberto Ximenes, Rigelberd Lay Angelo Fernandes Alexandre Nogueira, Miguel Araújo, Edit Savio, Francyatma Ima Kefy, José Pereira.
Rep.: CharllY
