DILI- Klube DIT FC Dignifika Dignidade hafoin hetan Vitoria kontra Aitana FC iha jornada da-6 divizaun dahuluk Liga Futebol Timor-Leste (LFTL) epoka 2021 ho skore 3-2.
Golu vitória husi DIT marka husi jogador Venceslau Fatima iha minutu 17, 45+2 no Ruben Borges iha minutu 37.
Enkuantu golu husi Aitana Fc marka husi jogador Francyatma Ima Kefy iha minutu 63 no Edit Savio iha minutu 72.
“vitoria iha jogu ohin ne’e Dignifika Ami Nia Dignidade nu’udar ekipa kampiaun iha divizaun daruak iha tinan kotuk liu ba sa’e mai divizaun dahuluk epoka 2021“. Treinador DIT FC Fransisco Gama ba jornalista Sira iha Stadium Munisipal Dili sesta (17/12).
Fransisco hatutan, “sira garante iha jornada ikus ho konsistensia joga husi jogador sira ne’ebe ohin hatudu iha jogu manan Aitana FC no jogu ikus hasoru Lalenok United FC sai determinante ba sira iha zona degradasaun maibé sira hatene sei prepara saida no halo saida atu hasoru adversariu tanba sira nia distinu kontra Lalenok United FC sei determina iha minitu 90”.
Iha fatin hanesan treinador Aitana FC, Octavio da Costa hatete, “sira rekonese hetan derrota tanba sira falla buat barak iha defeza no lina klaran iha jogu ne’e maibé nia rekonese katak jogador sira esforsu aan iha jogu ikus bele marka golu rua, impaktu lakon husi jogu jogador sira ladun halo presaun no nonton deit jogador adversariu”.
Treinador ne’e afirma, “ba oin sira sei hadia di’ak liu tan husi sala sira ohin para jogu ikus bele kompete labele tun ba divizaun daruak no nia garante la tun ba divizaun daruak tanba jogador sira fiar nia no nia fiar ninia jogador Sira, durante jogu sira lakon tolu, empata 1 no manan Ida ne’e ba sira sei la tun ba divizaun daruak ne’ebe sira nia ekipa nafatin iha espiritu fighting para jogu ikus bele manan”.
Husi rezultadu vitória ne’e la muda pozisaun DIT Fc nian no mantein iha zona mean ho pontus 3 husi joga dala lima manán dala ida no derota dala haat (4) no ameasaadu hodi degrada ba segundu divizaun maibé sei determina iha jogu jornada ikus kontra Lalenok United Fc.
Enkuantu Aitana Fc okupa iha 6 klasifikasaun provizoriu LFTL Primeira divizaun ho pontus haat (4) husi joga dala 5 manán dala ida (1) empata dala ida (1), no derota dala tolu (3).
Rep.: ADS
