DILI- Federasaun Taekwondo Timor-Leste (FTTL) realiza kampionatu nasional ne’ebe partisipa husi Dojan 20 husi territoriu Nasional nu’udar meius hodi selesiona atleta Nasional.
Hanesan federasaun Sira seluk, FTTL mos tenta kria kampeonatu regular hodi buka mellor atleta, nune’e bele prepara hodi enfrenta iha Jogu Internasionais.
“Durante mandatu Ami nian kampionatu nasional Ida ne’e dahuluk ba Ami ne’ebe Ami konvida Dojan iha kapital Dili no Munisipiu Sira Mak Mai partisipa ho klase senior deit para halo selesaun ba atleta sira ne’ebe Diak hodi foti tau hamutuk ba ekipa nasional hodi preparadu ba Asian Games no Sea Games iha tinan 2022”, Prezidente FTTL Gabriel da Costa ba jornalista Sira iha Fatin kampionatu nasional resintu SEJD, Lecidere, Dili sabadu (18/12).
Kampeonatu Nasional tan hetan apoiu finanseiru husi Governu liuhosi SEJD, iha ne’ebe sei hala’o iha Resintu Edifisiu Sekrerariu Estadu Joventude Desportu durante loron rua.
Prezidente FTTL hatutan, “kampionatu Nasional ba loron ohin ne’e Realiza tanba apoiu Orsamentu husi Sekretariu Estadu Juventude Desportu (SEJD) ho montante 19, 900 USD (dollar Amerikanu rihun sanulu-resin-sia atus sia), Mak sei halao iha resintu SEJD durante loron rua (18-19/ 12)“
Eziste kuaje dojan liu 20 Mak eziste iha territoriu Nasional. Balun kleur ona no balun seluk foin Mak dezenvolve. Ho nune’e, balun la konsege partisipa iha kampeonatu ba tinan ida ne’e.
“Kampionatu nasional Ida ne’e, partisipa husi Dojan iha kapital Dili no Munisipiu, kada dojan sei ho atleta nain-4 husi Feto no Mane. Maibe, iha dojan balun lakonsege partisipa tanba laiha atleta“. Nia hatutan
Iha sorin seluk, FTTL iha preparasaun Ida diak ba kualker situasaun, tanba ne’e sira konsege iha prestasaun diak iha povu nia matan.
“Ema hotu hatene modalidade Taekwondo lori prestasaun lubuk Ida ba nasaun Ida ne’e ho nune’e prezensa governu nian atu enkoraja no motiva Sira treinu Diak Liu Tan atu nune’e reprezenta Ema hotu nia orgullu“, Abrao hateten
SEJD mak Liman ain Governu nian ne’ebe sempre fo tulun ba kualker federasaun Despotiva iha Timor – Leste hodi kontinua buka, no dezenvolve talentu joven sira-nian iha area desportu.
Rep.: ADS
