DILI – Assalam fahe pontus ho Aitana hafoin empata ho score 2-2 iha jogu kontinuasaun Liga Futebool Timor-Leste (LFTL), jornada ikus epoka 2021 ho rezultadu empata ne’e save metin Assalam Fc iha Divizaun Primeiru LFTL.
Duelo entre Tropas Verde kontra Aitana Fc ne’e hala’o iha Estadion Munisipal Dili Kuarta (22/12). Iha inisiu jogu Primeira parte ekipa rua ne’e hotu hotu hatudu jogu furak iha kampu ho ambisaun hodi livre husi Zona Degradasaun.
Ho nune’e ekipa rua ne’e lansa kontra no ataka ba malu hodi marka golu maibé esforsu sira ne’e la fó rezultadu ne’ebé mak di’ak.
Maibé tama ba iha minutu 20 sorti di’ak monu ba ekipa Assalam Fc hodi lidera uluk ho score 1-0 liu husi jogador Jovanio Braz. Futebolista ho númeru kamizola 8 ne’e marka golu liu husi suta livre.
Ho rezultadu ne’e halo jogu kontinua ho tensi jogu ne’ebé mak aas maibé la iha golu ruma mak akontese to’o termina jogu primeira parte score mantein 1-0.
Kontinua ba jogu segunda parte Aitana Fc halo Assalam Fc hakfodak liu husi sedu Francyatma Ima Kefy iha minutu 48 hodi halo empata score ba 1-1.
Eis jogador Boavista Fc no Assalam Fc ne’e marka golu hafoin simu assistensia bola kruza husi nia kompaaineru Edit Savio.
Ho score ne’e halo jogu kontinua manas liu tan ho nune’e tama ba iha minutu 50 arbitu desde fó Kartaun kinor ba Adao Doutel hafoin komete hand ball, no Hasan Ramos ne’ebé mak halo protesta makas hasoru arbitu no dudu arbitu ho nune’e arbitu hasai kartaun mean ba Hasan Costa.
Menus jogador ida Aitana Fc aproveita hodi halo atake makas hodi lidera maibé Assalam Fc mak haboot fila fali score ba 2-1 liu husi Agostu da Costa.
Ho score refere jogu kontinua manas liu tan ho nune’e tama ba iha minutu 64 Aitana Fc tenke joga de’it ho na’in 10 hafoin Francelino Belo hetan kinor ba dala rua.
Ekipa rua ne’e hotu hotu joga nain 10 maibé la hatun intensidade jogu ho nune’e tama ba iha minutu 75 Francyatma Ima Kefy susesu marka tan golu ida hodi halo empata score ba 2-2.
Ho rezultadu empata 2-2 ne’e mantein to’o termina jogu segunda parte ekipa rua tenke fila ho pontu ida ida.
Husi rezultadu empata ne’e halo ekipa Assalam Fc, livre husi zona degradasaun ho pontus ne’en (6) no okupa iha 5 klasifikasaun.
Enkuantu Aitana Fc okupa iha 6 klasifikasaun ho pontus 5 no sei hein rezultadu jogu Lalenok United no DIT Fc hodi desidi se loos mak atu degrada ba segundu divizaun.
Assalam Fc: Junildo Pereira, Hasan Costa, Almerito da Silva, Joao Soares, Jaimito Soares, Adao Doutel, Riki Permana, Jovanio Braz, Martinho Belo, Bonarudin Amin, Emanuel Tunu.
Aitana Fc: Yusak Redjauw, Francelino Belo, Lamberto Ximenes, Rigelberd Lay, Angelo Fernandes, Alexandre Nogueira, Emelino Parada, Edit Savio, Francyatma Ima Kefy, José Pereira, Rivaldo Correia.
Rep.: CharllY
