Dili – Prezidente Federasaun Tenis Meza Timor Leste (FTMTL), Juliao Soares da Silva, informa, dadaun ne’e atleta permanente ne’ebé preparadu duni hodi tuir kompetisaun iha nivel nasionál ho internasionál hamutuk 10.
Federasaun Tenis Meza Timor Leste (FTMTL) ne’e hahú eziste iha Timor – Leste desde tinan 2000. Iha ne’ebe nu’udar espasu hodi aprende no prepara atleta hodi kompete iha Internasional.
“Atleta ne’ebé mak permanente hamutuk na’in 10 ne’e mak preparadu hodi kompete iha atividade sira iha rai li’ur nian no mós rai laran” prezidente FTMTL Juliao Soares da Silva ba jhd iha nia rezidensia kampung Baru segunda (27/12).
Atleta sira ne’e mai husi asosiasaun sira mak hanesan Asosiasaun Baucau, Liquica, Maliana, Ermera no Ainaru.
“Ba tinan 2022 ita sei hala’o lai kongresu extra oridinariu ida hodi hili fila fali estrutura foun” tenik nia.
Durante ne’e, desde 2000 FTMTL ba partisipa ona iha eventu internasional sira hanesan Macau, Repúblika China, Darwin, Portugál, no ikus liu iha Indonézia, maibé seidauk hetan medala husi ne’eba no sempre fila ho liman mamuk.
“Atleta federasaun tenis meza ba partisipa Iha Malaysia Indonézia, Macau, Japaun, inklui Darvin dala 3 ami seidauk hetan medala husi ne’eba tanba ita nia atleta sira seidauk iha mentalidade di’ak para hodi hetan medala tanba monu iha mentalidade ho fiziku” dehan nia.
Enkuantu ba fundus atividade, Federasaun sempre hetan apoiu husi Governu liuhosi SEJD nomos Federasaun rasik.
Rep.: CharllY
