Dili – Treinador klubu Futebool Femenino AD SLB Jopi Fernandes, informa, sira sei halakon S’Amuser iha Final Taça Rosa Muki Bonaparte ne’ebé mak sei hala’o iha loron loron aban (08/01/2022).
Taça Rosa Muki Bonaparte epoka 2021 tuir ajenda lolos final hala’o ona iha loron 19 fulan Dezembru 2021 liu ba maibé tanba komisaun organizadora deside adia mai iha loron 8 fulan Dezembru 2022 ho razaun tanba taça ba kompetisaun ne’ebe halo iha rai liur no mai tarde.
Tuir treinador AD SLB Laulara Jopi Fernandes informa, garante sei manan S’Amuser Fc hodi sai kampiaun ba Taça Rosa Muki Bonaparte epoka 2021
“Ami garante katak sei manán S’Amuser iha Final hodi sai Kampeaun ba Tasa Rosa Muki Bonaparte 2021 ne’e” dehan Treinador SLB iha kampu demokrasia ohin (07/01).
Jopi hatete, maski hasoru ekipa forte hanesan S’Amuser ne’ebe mak sai kampiaun ba Liga Futebool Femenino Timor-Leste epoka 2021, maibé nia dehan joga ba kopa ho liga ne’e diferente.
Treinador ne’e hatutan, “Preparasaun jogadora Sira hasoru S’Amuser Fc di’ak tebes maski iha mudansa orariu ba jogu final lolos hala’o iha loron 19 Fulan Dezembru 2021 maibé muda mai iha loron 8 Fulan janeiru 2022 maski iha loron boot Natal no tinan foun nian treinu para oituan ne’ebe jogadora sira foin treinu depois loron boot maibé fiziku jogadora sira di’ak hela”.
Iha sorin seluk treinador S’Amuser Olisio dos Santos, informa, “sira Optimista sei halakon SLB Iha Final Taça Rosa Muki Bonaparte ne’e maske sira iha ferias ne’ebé mak naruk”.
“ami Optimista sei manan SLB iha final Taça Rosa Muki Bonaparte epoka 2021 maski depois feriadu naruk jogador sira balun ba pasa ferias iha foho ho familia sira no la iha tempu barak para sira treinu antes mai iha joga final kontra SLB” tenik nia.
Treinador ne’e informa, “komisaun adia jogu ne’e mai iha loron 8 fulan janeiru 2022 sente difisil oituan tanba preparasaun ba jogadora sira tuir treinu prepara fiziku no terkniku ne’ebe nia durasaun tempu limitadu ne’ebe iha feriadu naruk ba loron boot natal no tinan foun jogadora sira ba pasa feriadu iha foho. Maibé hanesan treinador prepara nafatin tekniku para oinsa hasoru adversariu iha jogu Final ne’e”.
Olisoi akresenta, “maske iha difikuldade oituan ba tempu treinu maibé sai treinador treinu nafatin fo fiar ba jogadora sira no entrega ba jogador sira iha kampu, no sira tenki esforsu hodi ultrapasa ba tempu krusial ne’ebe sira enfrenta ho treinu ne’ebe minim”.
“Maske treinu ladún masimu maibé nee la hamate espiritu jogadora sira hodi hatudu nia jogu no optimista sei manan SLB ho skore 1-0 selae 2-1 tanba nu’udar klube ida sempre optimista ba jogu iha kompetisaun maibé esforsu ekipa iha kampu durante minutu 90 mak determina se sei sai manan nain hodi sai kampiaun iha kompetisaun refere”.
Rep.: ADS
