Dili – Ad SLB susesu sai Kampeaun ba Tasa Rosa Muki Bonaparte 2021. Elvira da Silva marka golu tolu hodi lori nia ekipa manán ho score 4-3.
Jogu Final ne’e hala’o iha Estadion Munisipal Dili sabadu (08/01/2022), iha inisiu jogu ekipa rua ne’e hatudu jogu ne’ebé mak furak iha kampu no tama ba iha minutu 7 Sorte di’ak monu ba ekipa AD. S.L.B. hafoin Elvira da Silva susesu fura rede S’Amuser Fc hodi lori nia ekipa AD SLB lidera uluk ho score 1-0.
Sofre uluk golu ida la hamate espiritu kompetetivu ba ekipa S’Amuser Fc, nian hodi hatudu sira nia aan nu’udar ekipa ne’ebé mak superioridade iha Liga Futebool feto, ho nune’e tama ba iha minutu 18 Anina Costa, susesu lori nia ekipa S’Amuser responde hikas golu ida hodi halo balansu score ba 1-1.
Ho score refere jogu kontinua manas liu tan ho nune’e tama ba iha minutu 23 Elvira da Silva susesu marka tan nia naran hodi lori nia ekipa líder hikas ho score 2-1.
No tama ba iha minutu 41 klubu istimadu ho naran Makikit ne’e haboot liu tan score ba 3-1.
Golu terseiru husi Ekipa SLB nian ne’e marka husi jogador Elvira da Silva hafoin jogador ho númeru kamizola 22 ne’e hatudu nia asaun hodi kedok guarda rede S’Amuser Fc hafoin marka golu bá da tolu alias hatrick.
Ho score 3-1 maske ekipa rua ne’e mantein lansa kontra ataka ba malu maibé score mantein la muda to’o termina jogu primeira parte.
Kontinua ba jogu segunda parte la presiza tempu naruk ba ekipa zigante hanesan AD. S.L.B. ne’e hodi haboot liu tan score ba 4-1 hafoin Julia Belo aumenta tan golu ida iha minutu 46.
Tama ba iha minutu 56 S’Amuser konsege hamihis score ba 4-2 hafoin Cecilia Godinho susesu fura rede AD. S.L.B.
Ritmu joga komesa manas no tama ba iha minutu 78 S’Amuser konsege hetan oportunidade hodi marka tan golu ida hafoin arbitu deside fo Penalti ba S’Amuser. No Dolores da Costa ne’ebé mak sai ezekutador ba Penalidade ne’e falla tan bola aas liu.
Dolares foin marka golu hodi hamihis score ba 4-3 iha minutu 86, no ho score refere mantein to’o termina jogu segunda parte vitória ba AD. S.L.B. hodi sai Kampeaun ba Tasa Rosa Muki Bonaparte 2021.
Rep.: CharllY
