Dili – Kinta feira (13/01) ne’e , Prezidente Konfederasaun Desportu Timor Leste (CDTL ) Macario Sanches hala’o enkotru ho dirijente Federasaun Nasionál Basketból Timor Leste (FNBTL) no Federasaun Basketból Timor Leste (FBTL), hodi buka Solusaun ba grupu rua ne’e iha Federasaun Basketbool, tanba CDTL lakohi para iha futuru atleta sai tan vitima ba problema ne’ebé mak akontese iha Federasaun nia laran.
Hafoin remata enkotru prezidente CDTL Macario Sanches informa, objetivu husi enkotru ho dirijente husi Federasaun Nasionál Basketból Timor Leste (FNBTL) no dirijente husi Federasaun Basketbool Timor Leste (FBTL) ne’e hodi buka Solusaun, relasiona ho dualismo ne’ebé mak akontese ba Federasaun basketbool ne’ebé mak mosu desde tinan 2018 nia laran hodi hamate atividade Basketbool Timor-Leste.
“Ohin CDTL hamutuk ho estrutura bolu, grupu sira ne’ebé mak durante ne’e sente katak sai vitima iha Federasaun Basketbool Timor Leste tanba ne’e mak CDTL bolu sira mai para atu rona informasaun báziku husi sira saida mak akontese durante ne’e” informa prezidente CDTL Macario F. Sanches ba jornalista iha nia knaar fatin.
“Problema ne’e akontese desde tinan 2018 ne’e mak ami hakarak rona sa opsaun estratéjiku mak para bele ba futuru melora fali Federasaun refere. Konfederasaun lakohi para iha futuru atleta sai tan vitima ba tanba problema ne’ebé mak akontese iha Federasaun nia laran, ami ohin rona informasaun lubuk ida no sira fó ona opsaun fó hanoin oinsá atu bele foti Solusaun” tenis Macario.
Prezidente CDTL ne’e explika, Konfederasaun iha ona opsaun balu no sei hatene tuir tanba ne’e mak ohin sira mai aprezenta sira nia dokumentu ne’ebé mak durante iha ona tanba CDTL iha orgaun juridiku orgaun fiskal para atu halo analiza hodi foti desizaun para bele melhora Federsaun sira nia futuru.
Macario akresenta, “problema Federasaun sira nian ne’e CDTL mak bele fó Solusaun tanba CDTL mak sai mahun ba Federsaun hotu tanba ne’e karik sira iha problema CDTL prontu hamrik oin para rezolve“.
“Ami fo ona opsaun balu no fiar katak desizaun ne’e ami foti antes tama fulan Juñu 2022 ami iha ona desizaun atu bele lori Federasaun ne’e bele iha atividade depois ami foti desizaun, maibé sira sei diskute fila fali tanba sira tenke rona dala ida tan no bolu hotu grupu rua ne’e atu bele fo Solusaun ba sira katak ida ne’e mak desizaun di’ak ba Federasaun Basketbool” tenik nia
Iha fatin hanesan prezidente fiskalizasaun husi FBTL, Francisco Amaro Carvailho, informa, nia parte Agradese ba estrutura atual CDTL tanba hakas aan ona atu rezolve polemika dualismo ne’e .
“Ami Agradese ba estrutura foun CDTL ne’ebé mak hakas aan atu rejolve polemika ne’ebé mak akontese iha Federasaun Desportu sira iha Timor Leste” dehan nia
Nia afirma, “Federasaun Basketbool la’ós iha problema maibé tanba iha dualismu entre grupu rua FNBTL no FBTL entaun ohin ne’e mai hasoru CDTL, mai rona barak liu husi CDTL oinsá ba futuru atu ne’e rezolve situasaun Basketbool Timor Leste“
Tanba Amantes Basketbool sira liu liu atleta Basketbool joven sira ne’e sente triste tebes tanba tinan naruk ona la iha atividade tanba difisil atu dezenvolve sira nia talentu
“Ami iha esperansa enkotru ohin ho CDTL ne’e bele solusiona lalis tia no ohin prezidente CDTL mós fó esperansa tebes mai ami iha tempu badak nia dehan tarde liu mak fulan Juñu tinan ne’e” tenik nia
Nune’e mós, Sekretáriu jerál Federasaun Nasionál Basketbool Timor Leste (FNBTL), Isildo Tilman afirma, ohin FNBTL simu konvite husi estrutura foun CDTL ne’ebé mak hakarak rezolve polemika iha Federasaun Basketbool nian ne’ebé mak durante ne’e mósu
Maibé FNBTL mantein pozisaun ne’ebé mak hetan legalidade juridika no rekonese husi estadu no mós rekonesementu husi Federsaun internasionál sira.
Maske nune’e Sekretáriu jerál ne’e esplika, Enkotru ne’e la’o di’ak tebes tanba CDTL iha hanoin di’ak hakarak tau fali Federasaun sira la’o ho di’ak no espera katak iha enkotru tuir mai bele iha rezultadu di’ak
“Ami Federasaun ne’ebé ke legal laiha tan Federasaun seluk no durante atividade lalao tanba parte balu mak la rekonese nune’e ami la hetan finansiamentu husi ne’eba. Ami mós nakloke se FBTL hakarak la’o hamutuk bele la’o se sira hakarak duni mai la’o hamutuk mai ita la’o hamutuk hodi dezenvolve di’ak liu tan atleta Basketbool sira hodi nune’e sira bele hatudu sira nia talentu” tenik nia
Rep : ekipa kobertura
