DILI- Orgaun Liga Futebol Timor-Leste (LFTL) sei resolve uluk administrasasun klube sira nian ne’ebe compete iha Liga futebol periodu 2021, molok realiza atividade Liga Futebol.
Iha Tinan Ida ne’e, atividade hotu hotu lao normal fila fali, inklui atividade desportu. Ho nune’e Orgaun LFTL book-aan daudaun ona atu bele realiza liga futebol iha fulan marsu.
“tinan ida ne’e ami komesa book an iha ona enkontru dahuluk hamutuk ho ami nia prezidente no nia hatete ho onestidade katak iha marsu nia laran lalika hein saida mak governu fo mai, liga tenki la’o” Diretor verifikasaun Lisensa Jose Carvalho ba jornalista iha nia knaar fatin, Bairro Formosa, Dili Sexta (14/01).
Maske nune’e parte liga sei enfrenta kestaun ne’ebe tenke ser solusiona molok hakat ba realiza Liga Futebol. Kestaun ne’e prosesu administrasaun ba klube ne’ebe kompete iha tinan kotuk.
“lakuna ida mosu hela mak prosesu administrasaun (transferensia osan) ba klube sira, ne’ebe sai hela kauza tanba parte federasaun seidauk responde ba kondisaun sira ne’e, ne’ebe sai hela lakuna ida ba liga atu hare’e entaun orgaun liga sente hela, se ansi dudu buat ida maibe buat seluk seidauk reolve orsida hetan fali kritika”, Nia haklean.
Ho kondisaun Ida ne’e maka trava hela prosesu hotu ba realizasaun liga nian. Hahu husi janela transferensia, kriasaun orariu liga nomos rejistasaun. Tan ne’e kestaun esensial ba kada klube mak nesesariu hodi esforsu ba buka solusaun.
“To’o ohin loron parte finanasa tenta hela atu resolve ba lakuna ne’e” nia hatutan.
Enkuantu prosesu administrasaun ne’e hanesan insentivu ba kada klube iha fin do jogu para sira labele hasoru problema finanseiru bainhira realiza Liga.
Rep.: ADS
