DILI-Comite Olimpico Nasional Timor-Leste (CONTL) no Confederação Desporto Timor-Leste (CDTL) sigla Portugés enkontru ho Sekretariu Estadu Juventude Desportu (SEJD) hodi diskute Preparasaun atleta husi federasaun 8 partisipa Sea Games iha Hanoi, Vietnam ne’ebe sei realiza iha loron 12 to’o 23 Maiu tinan ida ne’e.
Iha enkontru ne’e parte tolu diskute Kona ba atributu no ekipamentu, preparasaun atleta sira nia ba Sea Games no kriteria sira seluk, atu nune’e bele iha atleta kualidade para hetan rezultadu pozitivu iha kompetisaun refere.
“Ohin ita diskuti lubuk ida ho SEJD liu-liu oinsa CDTL ho CONTL prepara hare liu ba ekipamentu ba jogu, ne’ebe lori atleta sira seguru iha durante prosesu preparasaun nia laran, inklui mós koalia kona ba atleta sira desloka ba Vietnam, diskute mos oinsa atleta sira ninia preparasaun atu bele iha kualidade ba Sea Games 2022 husi federasaun 8”, prezidente CDTL Macario F Sanches ba Jornalista sira iha fatin enkontru Edifisu SEJD, Lecidere, Dili kinta (27/01).
Preparasaun ba Atleta sira fahe ba faze rua, ne’ebé sei lansa iha fevereiru nian lafran, faze dahuluk atleta ida-idak sei halo preparasaun no treinu iha federasaun nia fatin hoi da-idak treinu iha uma, no faze daruak sei konsentra iha fatin ida hodi halo preparasaun ikus, molok fulan ida desloka ba Vietnam.
“Iha loron 04 fulan Febreiru sei halo lansamentu ofisial ba preparasaun atleta atu ba Sea Games ninian, depois atleta sira nia federasaun sei konsentra iha ida-idak nia fatin ou halo treinamentu iha sira nia fatin hanesan Taekwondo no seluk-seluk tan, depois fulan ida antes deslokasaun ba iha eventu ne’e mak foin konsentra iha fatin ida atu bele kontrola no halo advokasia ba regra, no preparasaun ba teste mediku nian liu-liu hare ba Covid-19 no anti doping nian”.
Enkontru refere mós koalia klean kona-bá oinsa Timor – Leste bele priense kritéria hodi bele partisipa iha Sea Games, liu-liu tenki iha atributu no ekipamentu rasik, teste anti-doping, no sertifikadu vasinasaun
“komisaun organizador Sea Games nian ne’ebe kada nasaun Ida tenki ho atributu no ekipamentu rasik, teste anti doping ba atleta sira antes fulan tolu sira desloka ba Vietnam no sertifikadu vasinasaun. tanba atleta sira tenki simu vasinasaun booster Pfizer “doze datoluk” ne’ebe nia sertifikadu hetan kunesementu husi governu. Tanbá buat sira kriteria importante ba atleta sira kada nasaun partisipa kompetisaun” vise-prezidente CONTL Mateus da Cruz hatete.
Iha Sorin seluk diretora nasional alta kompetisaun SEJD Maria L Monteiro dehan, rezultadu husi enkontru parte SEJD atu haree saida mak CDTL prepara ona ho CONTL ba partisipasaun atleta sira ba Sea games no parte Governu liuhosi SEJD hein katak partisipasaun Timor-Leste nian bele hatudu rezultadu pozitivu ba governu, tan ne’e governu akompana nafatin Preparasaun atleta sira nian no tarjetu saida mak federasaun sira iha ba partisipasaun Sea Games.
“Ami Enkontru ho CDTL no CONTL nia rezultadu atu haree saida mak CDTL prepara ona ba partispasaun atleta sira nian ba Sea Games, ami hein katak atleta sira bele hatudu rezultadu pozitivu ba governu tuir tarjetu federasaun sira iha Sea Games”. Diretora hatete
Enkuantu, Timor-Leste nia kontinjénsia ba partisipa Sea Games kompostu husi atleta nain-44, atleta individu 22 no jogador futebol 22, no mai husi federasaun 8 mak hanesan Atletizmu, Taekwondo, Boxing, Natasaun, Karate-Do, Halterofilizmu, Voleibol no Futebol.
ADS
