DILI- Federasaun Billiard Timor-Leste (FEBITIL) hasoru Confederação Desporto Timor-Leste (CDTL) sigla portuges hodi aprezenta sira-nia programa ba tinan 2022 no planu estratejiku, hodi harii Asosiasaun Billiard iha munisipiu tomak.
Antes ne’e, FEBITIL afilia ba CDTL iha dezembru tinan kotuk, tanbá ne’e ohin sira halo aprezentasaun ba CDTL hodi reativa fali aktividade federasaun nian, hodi halo ba planu 2022, programa estratejiku, organiza desportu area billiar no harii asosiasaun billiard ba munisipiu tomak.
“Ami hanesan estrutura FEBITIL nian mai hasoru no kuñese prezidente CDTL ho nia estrutura foun, hodi aprezenta programa ne’ebe hanesan federasaun foun harii iha 2019 atu reativa fila fali atividade federasaun nian, hodi hahu halo programa ba tinan ne’e no ba tinan lima nian, hodi organiza desportu billiard no hari’i asosiasaun iha munisipiu tomak”, prezidente FEBITIL Francisco Maukura ba jornalista sira iha fatin enkontru edifisu CDTL, Colmera, Dili sesta (28/01).
Enkuantu, parte CDTL ne’ebé sai mahón ba Federasaun hotu, liuhosi Prezidente apresia no kongratula kona-bá informasaun ne’ebé konsege partilla iha sorumutuk ohin loron nian.
“Ami hetan vizita husi FEBITIL atu aprezenta sira-nia programa, tanba hanesan federasaun desportivu ida foun hakarak mai fahe informasaun kona-bá dezenvolvimentu desportu nian, ne’ebe ita apresia no kongratula tanba federasaun billiar foin afilia ofisialmente mai CDTL iha loron 11 Dezembru 2021” Macario dehan
Iha hasoru malun refere, parte CDTL mos fahe enkoraja estrutura FEBITIL atu bele hadiak no dezenvolve liu tan federasaun liuhosi hadia administrasaun federasaun nomós bele transforma billiard husi jogu komunitáru ba jogu professional.
Tuir Planu, FEBITIL mós sei apresenta programa hirak ne’e ba governu liuhosi Sekretáriu Estadu Joventude Desportu.
CharllY Junior
