Díli – horseik, enkontru exco ba preparasaun kongresu FFTL labele akontese tanbá menbru ezekutivu sira la marka prezensa no la priense korum. Ho nune’e kongresu ne’ebé sei akontese iha fulan fevereiru sei la’o de’it ho ajenda 4 : hato’o relatoriu ba atividade 2021, relatoriu finanseiru, relatoriu auditoria, no eleisaun ba ezekutivu.
Antes ne’e, sekretariadu FFTL hasai ona karta ba membru sira hodi prepara hatama pedidu ajenda ba kongresu nian durante loron 30, hahú husi loron 21 dezembru 2021 to 31 janeiru. Nune’e, enkontru horseik atu bele halo melloramentu ba ajenda kongresu nian, maibé tanbá la priense korum entaun, tuir adjuntu FFTL katak kongresu sei akontese tuir ajenda tentative ne’ebé prepara ona.
“Infelizmente enkontru horseik la priense korum tuir estatutu Federasaun nian no mos ba membru ezekutivu la prezente pursentu 50+, ne’e duni enkontru ita la deside buat ida no ajenda mak antes ne’e ita fo sai ona, iha antes loron 60, ita avansa ho ajenda ida ne’e deit ona” Adjuntu sekretariu FFTL Frederico Martins ba Jornalista sira iha nia knaar fatin, Bairro Formosa, Dili segunda (31/01).
Iha loron 21 fulan dezembru 2021, loron 60 molok kongresu, parte sekretariadu haruka ona ajenda tentative ba menbru sira, ajenda sira ne’ebé sei akontese iha kongresu iha loron 26, fulan fevereiru 2022. Tanbá, la akontese enkontru entaun ajenda tentative ne’e mak sei lori ba deside iha kongresu.
“Ajenda ba iha kongresu mak hato’o relatoriu ba atividade 2021 nian, relatoriu finanseiru inklui relatoriu auditoria nian no ikus mak eleisaun ba kargu sira ne’ebe anunsia ona ba elesisaun fahe ba parte haat mak esleisaun kargu prezidente, vise prezidente, membru ezekutivu feto no membru ezekutivu FFTL” nia hatutan.
Enkuantu, Tuir estatutu Federsaun karik to’o iha kongresu mak ajenda la pasa, bele halo fali ajustamentu para atu kria fali ajenda foun durante iha kongresu nian laran, se maioria membru la aprova maka fo fali tempu 15 ka 30 minutu hodi halo fali ajustamentu ho membru ne’ebe mak hakarak hatama sira kestaun ruma ba ajenda kongresu, entaun bele elabora fila fali nune’e bele kontinua fali kongresu.
ADS
