DILI- Klube Karketu Dili FC sei defende títulu kampiaun iha liga Timorense epoka 2022, atu nune’e sai klube dahuluk ne’ebe sai kampiaun divizaun dahuluk Liga Futebol Timor-Leste (LFTL) dala rua tuir-tuir malu Hodi halo Istoria iha Liga Timorense.
Liga Timorense besik hahu dadaun ona, iha ni-nia dezenvolvimentu to’o ohin loron seidauk iha Klubu Ida Mak sai kampeaun ba epoka Rua tutuir malun. tanba ne’e, Karketu FC liuhosi Prezidente Klubu hakarak realiza istoria Ida ne’e liuhosi sira-nia preparasaun ba epoka 2022.
“Ami sei defende kampiaun liga Timorense iha tinan kotuk, maski ne’e servisu boot Ida mai ami, duke Ita manan sai kampiaun no iha mehi ba liga futebol Timor-Leste sai kampiaun dala rua tuir-tuir malu liu husi ami nia preparasaun ba operasional no finansial ne’ebe ami sei hala’o ba Liga Timorense epoka ne’e, tanba iha Timor-Leste seidauk iha Klube ida mak halo istoria kampiaun dala rua tuir-tuir malu”, presidente Karketu Dili FC Adilson Ribeiro ba jornalista JHD iha edifisu klube, Audian, Dili tersa (2/02).
Tuir Orariu tentativa ne’ebe fo sai husi parte Liga katak Liga Timorense epoka 2022 Sei akontese iha Fulan marsu. Maibe, parte Karketu konsidera Ida ne’e seidauk fiksu, nune’e Sira seidauk halo preparasaun seriu
Prezidente hatutan, “seidauk serteza tanba Federasaun Futebol Timor-Leste (FFTL) sei halo kongresu no atual prezidente LFTL rasik kandidatu an ba presidente FFTL maski klube halo ona reuniaun seidauk to’o faze preparasaun ne’ebe hein hela bainhira LFTL públika kalendariu serteza ona ba tinan ida ne’e, ami mos komesa halo preparasaun jogador, tanba esperensia klube nian bainhira halo ona prepasaun jogador, kustu operasional no finansial no buat hotu La’o ona entaun klube evita kustu ida ne’e”.
Adilson informa, jeralmente sira preparadu tanba jogador sira ne’ebe tinan kotuk reforsa klube ne’e sira deklara mantein mesmu sira nia kontratu hotu ona maibe sira loial nafatin no prontu reforsa klube ne’e ba liga Timorense Epoka 2022 no sira hein deit kontratu foun husi klube atu asina hamutuk ne’ebe antes liga ne’e hahu halo preparasaun oituan deit no planu atu kontratu jogador husi klube seluk.
“Jeralmente ami nia jogador sira preparadu tanba jogador sira tinan kotuk reforsa klube ne’e sira deklara mantein mesmu sira-nia kontratu hotu ona, maibe sira leal nafatin no prontu asina kontratu foun ho ami” Nia sublina.
Ho resultadu evaluasaun ba perfonmansia jogador enjeral iha 2021, parte klube presija aumenta armada iha Lina avansadu no mediu
“ami halo evaluasaun tinan kotuk nian, Ami presiza jogador avasadu no mediu tanba hakarak hadia lina rua ne’e, ne’ebe ami planu atu kontratu jogador estrajeiru nain tolu ho tipu avasadu no mediu tanba Lina baliza no defeza jogador lokal sufisiente hela atu atende lina ne’e ne’ebe ami sente ekipa forte ona” Nia hateten
Karketu Dili FC Mak klube sai kampiun iha Liga Amadora Epoka 2017 no Kampiaun liga Timorense Epoka 2021 sai hanesan klube Timor Leste ne’ebe hetan titulu Kampiaun Dala rua maibe la tuir-tuir ne’ebe iha Tinan ne’e sira hakarak halo Istoria defende titulu Kampiaun liga Timorense no halo klube dahuluk iha Timor-Leste kampiun liga dala rua tuir-tuir malu.
ADS
