DILI- Atleta husi Federasaun Natasaun Timor Leste (FNTL) iha esperansa sei hatudu prestasaun di’ak iha eventu internasional Sea Games, Vietnam iha fulan Maiu tinan ne’e, maske Sira hasoru dezefius iha fasilidade ba treinamentu.
Federsaun Natasaun Timor-Leste hanesan Federsaun ne’ebé mak ki’ikoan liu kompara ho Federsaun sira, no sira nia atleta mós oituan maibé Federsaun Natasaun mós iha prestasaun, nune’e Federsaun Natasaun partisipa ona eventu internasional barak.
Iha tinan ne’e Federsaun Natasaun Timor-Leste sei haruka Atleta hamutuk na’in tolu mak sei reprezenta Timor-Leste iha Sea Games Hanoin Vietnam, atleta na’in 3 ne’e mak Imelda Felisita Borges, José Joao da Silva, no Jolanio Guterres.
Tuir Atleta Federasaun Natasaun Timor Leste, Imelda Felisita Borgues katak, sira komesa halo ona perparasaun antes sira rona isu katak natasaun mós sei reprezenta Timor Leste iha Sea Games tanba ne’e desde fila husi championchip sira komesa prepara ona.
“Hau sempre tuir ona eventu internasional ,maibe agora ba ne’e para atu hetan prestasaun, ne’ebé grasa Maromak nian, ita sei esforsu iha Sea Games Vietnam, ami nia esperansa, espera katak Maromak tulun iha metru naruk para bele to’o final” dehan atleta Imelda ba jornalista sira iha Timor Plaza Dili (05/02).
“Fasilidade hodi halo preparasaun hanesan baibain maibé ida ne’e la sai kestaun ba atu hapara treinamentu ida ne’e no nafatin kontinua de’it” Nia haktuir.
Iha fatin hanesan, Jose Joao da Silva Viegas hatete sira nia preparasaun atu kompete iha Sea Games Vietnam lorloron kontinua prepara hela.
“Wainhira ba kompete iha ne’ebá ha’u sei hatudu prestasaun di’ak tanba ami halo preparasaun iha ne’e durante fulan 3”dehan nia.
Enkuantu ba Fatin treinamentu la permanente iha Fatin Ida, antes ne’e treinu Timor Logde, pois iha Pisina Golgota no dalaruma mos treinu iha tasi.
CharllY Junior
