Dili – Timor Leste faila rekolla vitória iha jogu dahuluk AFF Championsip sub 23 grupu (A) kontra Filipina hafoin empata ho score 2-2.
Duelo entre Timor Leste kontra Filipina ne’e hala’o iha Morodok Techo National Stadium Cambodia segunda (14/02).
Iha inisiu jogu ekipa Selesaun nasionál Timor Leste ne’ebé mak foti inisiativa serang konsege domina bola ho nune’e tama ba iha minutu 5 Ekipa lafaek konsege hetan hetan Oportunidade Penalti hafoin linha defensivu husi Filipina hamonu Elias Mesquita iha iha area grandeal ho nune’e arbitu deside hodi fó Penalti ba Timor Leste.
No Jogador Mouzinho de Lima ne’ebé mak sai ezekutador ba Penalidade refere susesu fura rede Filipina nian hodi lori Timor Leste lídera ho score 1 – 0.
Ho golu ne’e Timor Leste kontinua la ataka hasoru ekipa Filipina ho nune’e tama ba iha minutu 19 Elias Mesquita hetan Oportunidade hodi aumenta tan golu, hafoin simu bola kruza husi Yohane Paulos maibé la konsege aproveita ho di’ak nune’e la rezulta golu.
No tama iha minutu 45 ekipa Filipina konsege responde golu ida liu husi jogador Ivan Ouano hodi halo empata score ba 1-1.
Golu ne’e akontese hafoin defeza husi ekipa nasionál Timor Leste la konsege kontrola bola ho di’ak nune’e Ivan Ouano aproveita hodi fura rede Timor Leste ho nune’e ekipa rua ne’e tenke taka jogu Primeira parte ho score 1-1.
Kontinua ba jogu segunda parte tama ba iha minutu 50 Timor Leste konsege suta ameasa dala ida tan liu husi suta livre maibé bola husi Mouzinho de Lima sei bele antisipa ho di’ak husi guarda rede núne’e la rezulta golu.
Tama ba iha minutu 54 Filipina konsege lansa suta ameasa dala ida tan ba rede Timor Leste, liu husi jogador Ivan Ouano maibé seidauk kona iha tarjetu.
Timor Leste foin lidera hikas iha minutu 55 hafoin Jaimito Soares, hatudu nia asaun hodi kedok defaza nian tolu hafoin suta ba rede laran hodi muda aumenta score ba 2-1
Timor Leste lansa suta ameasa dala ida tan iha minutu 60 maibé bola husi Mouzinho de Lima seidauk bele rezulta golu.
Tama ba iha minutu 62 Filipina konsege halo empata score ba 2-2 hafoin Ivan Ouano fura tan rede Timor Leste.
Maski ekipa rua ne’e kontinua halo kontra ataka ba malu maibé la iha tan golu ruma mak akontese ho nune’e ekipa rua ne’e tenke fila ho pontu ida ida.
Enteretantu Timor Leste sei iha jogu rua kontra Brunei Darusalam iha loron 17 no sei kontra uma na’in Cambodia iha loron 20 fulan ne’e.
CharllY Junior
