DILI – Federasaun Tenis Meza Timor-Leste (FTMTL) simu opsaun rua : ajusta estrutura ne’ebe iha ona no halo asembleia extraordinariu, husi Confederação Desporto Timor-Leste (CDTL) sigla portuges hodi rezolve problema dualizmu ne’ebe durante ne’e federasaun enfrenta hela.
FTMTL daudaun ne’e hasoru komflitu internal, entre estrutura tuan no foun ne’ebe halo atividade hotu la la’o. Tanba ne’e CDTL bolu parte rua hodi halo mediasaun atu nune’e, bele buka dalan para resolve komflitu refere.
Tuir Vice Prezidente FTMTL foun, CDTL fo opsaun rua nu’udar dalan atu resolve problema refere, ne’e Mak : ajusta estrutura rua no halo asembleia extraordinariu.
“Ohin ami – nia delegasaun husi Presidente foun nian mai halo diskusaun ho prezidente tuan no CDTL ne’ebe ami simu ona opsaun rua husi CDTL mak ajusta deit estrutura ne’ebe iha ona ka halo asembleia extraordinariu” Vise Prezidente Foun Saturnino Saldanha ba jornalista JHD iha fatin diskusaun edifisiu CDTL Caicoli, Dili tersa (14/02).
Nune’e husi parte Vice Prezidente foun sei lori opsaun rua ne’e ba estrutura hodi tetu para bele foti pozisaun hodi resolve problema Federasaun.
“ne’ebe ami sei hato’o fali ba ami nia prezidente no Sekretariu jeral foun depois mak sira buka fali tempu hodi tuur hamutuk fali ho prezidente tuan rezolve problema federasaun nian” Saturnino Afirma
Iha sorin seluk Prezidente tuan FTMTL Julião Soares foti kedan pozisaun katak, aseita hodi halo asembleia extraordinariu hodi bele hadia Federasaun ba oin.
“Hau hanesan prezidente tuan hau aseita para Ami atu halo asembleia extraordinariu para atu hadia Federasaun Tenis Meza ba oin hodi hetan suporta husi goveru Hodi prepara atleta sira ba futuru” Nia dehan.
Iha fatin hanesan vise-prezidente CDTL Zeferino V. Tilman, Informa katak opsaun rua ne’e bele lori parte rua tur hamutuk hodi bele hetan solusaun ba komflitu refere.
“ba opsaun rua ne’e sira sei tuur hamutuk ikus mai sira hetan ona solusaun ruma, sira mai fali hodi fo informasaun ba ami no Ami tuur hamutuk ho sira hodi solusiona sira nia problema no mos ami halo relatoriu ba iha orgaun kompetente iha area desportu liuliu SEJD no Komisaun nasional desportu” Zeferino hateten
Durante ne’e Federasaun Tenis Meza Timor Leste labele halo atividade ruma, tanba kauja komflitu entre estrutura versaun tuan no foun.
ADS
