DILI- Atleta nasional Anastacio da Costa husi modalidade body building husi Federação Halterofilismo Cultura Fisico e Peso Timor-Leste (FHACUPTIL) sigla portuges sei esforsu hetan medalla ruma hodi lori mai Timor-Leste iha Sea Games 2022 ne’ebe sei realiza iha sidade Ha Noi, Vietnam iha fulan Maiu tinan ne’e.
Partisipasaun Timor-Leste iha Sea Games 2022 iha Vietnam, tinan ne’e atleta nasional husi modalidade body building sei esforsu hetan medalla ruma lori mai Timor-Leste tanba sira hetan fiar husi nia federasaun.
“ami esforsu para atu lori medalla ruma mai iha ita nia rai ida ne’e, ba Sea Games ami labele ba para partisipa deit maibe ami mos hakarak ba para hatudu ami nia kualidade iha ne’eba, tanba sai atleta sempre hakarak oferese ida ne’ebe diak ba ita nia nasaun liu husi ami preparasaun ne’ebe lao diak ne’ebe loron-loron ami sempre halo ezersisiu” Atleta body building Anastacio da Costa ba jornalista sira iha GMT Caicoli, Dili kuarta (16/02).
Alende halo treinu atleta sira mos esforsu kompleta sira nia hahan rasik nune’e sira bele halo treinu diak liu tan, atu nune’e ba iha Sea Games hatudu sira nia kualidade nu’udar atleta nasional ne’ebe reprezenta rai ida ne’e
“Iha ami nia preparasaun ida ne’e ami mos sempre esforsu kompleta ami nia hahan rasik nune’e oinsa para treinu diak atu nune’e iha Sea Games ne’e, ami bele hatudu kualidade maski preparasaun foin mak ita hahu prepara an” Anastacio dehan
Iha fatin hanesan Treinador modalidade body building Pedro do Rego hatete, durante preparasaun nia haree liu ba fiziku no tuir nia observasaun atleta sira besik ona nia expetativa sei haree atleta sira nia kondisaun ikus tanba suplemen ne’ebe suporta atleta sira foin mak to’o ba atleta sira
“Durante preparasaun hau haree liu ba atleta sira nia fiziku ne’ebe sei menus, hau esforsu no hakas sira hodi kompleta fiziku ne’ebe sei menus iha sira nia isin no tuir hau nia observasaun haree besik tuir expetativa hau nian, no ita hein, tanba buat ne’ebe atu suporta sira hanesan suplemen foin mak to’o mai depois ida ne’e sira konsumu tiha mak ita foin bele haree kondisaun ikus mai” Tenik Pedro
Hanesan treinador, Pedro otimista ba nia atelta sira sei lori medalla ruma mai ita nia nasaun maske nia seidauk hatene nia atleta atu kompete iha klase ne’ebe tanba sei to’o fatin kompetisaun mak tetu hodi determina nia atleta nia klase ne’ebe agora nia fo treinu para atleta sira hadia isin halo muskulu boot.
Atleta hirak ne’e sei kompete iha klase tuir Sira idak-idak Nia peso, bainhira tetu iha Vietnam.
ADS
