Dili – Timor Leste susesu halakon Brunei Darusalam ho score 3-1 iha jogu daruak AFF U23 pool (A) mak hala’o iha Morodok Techo National Stadium kinta (17/02).
Timor Leste ne’ebé iha amibasaun atu rekolla pontu masimu hahú domina desde kick off, ekipa lafaek domina bola husi ain ba ain hodi sobu defeza husi Brunei Darusalam, maibé linha defensivu husi Brunei mós solidu nune’e seidauk bele produs golu.
Timor-Leste mak sofre uluk golu ida iha minutu 17 hafoin Mohammad Hakeme fura rede Timor leste ne’ebé mak hein husi Junildo Pereira ho nune’e score muda aan ba 1-0.
Timor Leste ne’ebé mak sofre uluk golu ida konsge domina nafatin bola hodi halo kontra atake ba Brunei Darusalam maibé seidauk bele produs golu.
Tama ba iha Minutu 28 Timor Leste halo kedas subtituisaun ba jogador Elias Mesquita no hatama fali jogador prinsipál Timor Leste Paulo Gally ne’ebé mak adeptus Timor Leste hotu hein.
Prezensa Paulo Gally iha kampu la fó influénsia boot ba ekipa ho nune’e tama ba iha minutu 30 Timor Leste konsege responde golu ida hodi halo balansu ba score 1-1 liu husi Mouzinho De Lima.
Ho score refere Timor-Leste Kontinua hatudu ritmu jogu hodi halo kontra ataka ba Brunei Darusalam ho nune’e tama ba iha minutu 45 molok atu termina jogu primeira parte, Paulo Gally susesu fura rede Brunei Darusalam liu husi suta livre hodi lori Timor-Leste taka primeira parte ho score 2-1.
Kontinua ba jogu segunda Timor Leste kontinua domina bola hodi halo atake ba Brunei Darusalam no tama ba iha minutu 81 atake husi Timor Leste halo ekipa Brunei Darusalam falia hodi kontrola bola no halo auto golu husi kapitaun Brunei Darusalam Wafi hodi muda aumenta score ba 3-1.
Score 3-1 la para ho ida ne’e Timor Leste kontinua fo presaun ba Brunei Darusalam ho bola husi ain ba ain maibé la konsege aumenta tan golu to’o termina jogu score mantein 3-1 vitoria ba Timor-Leste.
Husi rezultadu vitória ne’e lori ekipa Lafaek nurak U23 lídera tabela klasifikasaun pool A ho pontus 4, husi joga dala 2, Manán ida no empata ida. Enkuantu Brunei Darusalam okupa iha pozisaun Ikus ho pontus 0 husi joga dala rua.
Iha jogu tuir mai Timor Leste sei hasoru ekipa uma na’in Cambodia iha loron 20 Fevereiru ne’e
CharllY Junior
