DILI- Comite Paralimpico Nacional de Timor-Leste (CPNTL) sigla portuges halo formasaun kona-ba oinsa klasifika atleta sira ba kada kategoria nune’e bele partisipa jogu internasional.
Antes ne’e, Atleta Paralimpico labele partisipa iha eventu internasional, tanba ofisial sira laiha konesiemntu hodi klasifika kada kategoria Atleta nian. Ho nune’e, CPNTL organiza formasaun kona-ba oinsa klasifika Atleta paralinpico.
“ohin ami halo formasaun ba klasifikasaun atleta sira, ne’ebe sai istoria dahuluk ba CPNTL, tanba ba dahuluk ami nia organizasaun hetan oportunidade halo formasaun ida ne’e, formasaun ida ne’e iha futuru ba partisipante sira bele hatene materia treinamentu ne’ebe sira hetan iha formasaun ne’e, hodi halo klafikasaun ba atleta sira hodi halo teste ba atleta defisiente sira ne’ebe tuir kompetisaun nasional no internasional” reprezentante prezidente Aniceto Berlelo husi nia diskursu iha fatin formasaun Xanana Sport Center Bairro Formosa, Dili sabadu ( 19/02).
Formasaun Ida ne’e bele akontese nu’udar resultadu husi servisu hamutuk entre Federasaun ho Governu liuhosi SEJD, hodi bolu Sekretariu Jeral Paralympic Council Malaysia Sr Dato’ Subra Rama ho Cik Nurul Abdul Rahman nu’udar formador iha atividade Ida ne’e
“fo obrigadu ba delagasaun Nacioanl Paralympic Malaysia Dato’ Subra Rama (Sekretariu jeral Paralympic Council Malaysia) no Cik Nurul Abdul Rahman (Clasification Executive) sai formador iha formasaun ne’e” reprezentante prezidente hatutan.
Ho formasaun refere, SEJD iha deseju atu ofisial sira bele klasifika Atleta Sira iha futuru, nune’e bele partisipa iha eventu paralinpico internasional.
“Ba ofisial sira aproveita opotunidade sira hanesan ne’e hodi nune’e oinsa mak bele klasifika ita nia atleta sira iha momentu sira tuir mai tanba foin daudauk iha kompetisaun iha Tokyo, Japaun Timor-Leste labele partisipa tanba la iha kategoria ba atleta” Vasco dehan
Iha fatin hanesan sekretariu jeral Paralympic Council Malaysia Dato Subra Rama dehan, trata Atleta paralinpico diferente ho Atleta Sira seluk, tanba ne’e, ofisial Sira tenki konhese Atleta ho klean.
“atu trata atleta paralympic ne’e diferente oituan ho trata atleta normal sira, tanba sira defisiente, ne’ebe ita tenki hatene sira nia kondisaun no oinsa atu hili atleta ne’ebe defisiente iha aspetu fiziku no mental, ne’e mak ita bolu klasifikasaun. ita tenki hatene sira husi inisiu kedas no dezenvolve sira ho maneira ne’ebe diak ida ne’e ita sei hanorin buat sira ne’e ba partispante iha formasaun ne’e no ita iha esperansa katak sira bele ba aplika iha munisipiu sira no hanorin ba ema hotu” Dato hateten
Nia hatutan, materia sira hotu internasional ne’ebe ita sei hanorin hanesan mos iha Malaysia kona ba paralympic nian ba federasaun sira iha NPC Timor-Leste no partisipante sira nia sertifikadu sei fo husi NPC Timor-Leste no sira halo programa hanesan ne’e hodi Timoraoan sira hetan ninia benefisiu ho diak.
Partisipante iha formasaun ne’e mai husi federasaun sanulu mak Federação Atletismo Deficiente de Timor-Leste (FADTL), Federação Batminton Defisiente Timor-Leste (FBDTL), Federasaun Foti Besi Defisiente Timor- Leste (FFBDTL), Futsal Defisiente, Federasaun Bola Basket Kadeira Roda (FBBKRTL), Federação Tenis Deficiente Nacional de Timor-Leste (FTDMTL), Federasaun Defisiente Tenis Mesa Timor-Leste (FDTMTL), FederaçãoVoley Ball Siting Deficiente deTimor-Leste (FVSDTL), Federasaun Nani Adaptado Timor Lorosa’e, Federação Chadres Deficiente de Timor-Leste (FCDTL) Formador nain rua mai husi Malaysia Dato Subra Rama (Sekretariu jeral Paralympic Council Malaysia) no Cik Nurul Abdul Rahman (Clasification Executive), atividade ne’e hala’o durante loron tolu komesa husi 19-21 fevereiru 2022.
ADS
