Dili – Ekipa Selesaun nasionál Timor Leste susesu hakat ba semi finais AFF sub-23 Championsip 2022 hafoin halakon ekipa uma na’in Kambodia ho score 1-0 Liu husi Yue Safy nia autu golu iha jogu ikus pool (A) ne’ebe hala’o iha Morodok Techo National Stadium domingu (20/02).
Ekipa Selesaun nasionál Timor Leste ne’ebé mak komanda husi Treinador Fabio Marcial ne’e hatudu jogu impresivu desde inisiu, liu husi bola ho ain ba ain hodi halo Kambodia nia linha defensivu tenke servisu makas hodi salva sira-nia rede.
Iha minutu 18 Timor Leste lídera kedas ona ho score 1-0 hafoin jogador defensivu Yue Safy, falla kontrola bola hodi halo autu golu.
Auto golu ne’e akontese hafoin jogador Joao Bosco, suplay bola ba linha oin ne’ebé mak priense husi Paulo Gally no Mouzinho de Lima maibé defenza husi Cambodia Yue Safy kabesada tama fali ba nia rede rasik ho nune’e Timor Leste lídera ho score 1-0.
Timor-Leste konsege produs oportunidade barak hodi marka golu liu husi avansadu Paulo Gally ho Mouzinho De Lima maibé oportunidade hirak ne’e la aproveita ho di’ak nune’e to’o termina jogu primeira parte score mantein 1-0.
Kontinua ba jogu segunda parte ekipa uma na’in ne’ebé mak sofre uluk ona golu ida tenta halo kontra atake makas hodi halo golu maibé Linha defensivu husi Timor Leste la fó fatin ba Cambodia hodi marka golu.
Ekipa Selesaun nasionál Kambodia ne’ebé mak komanda husi Treinador Keisuke Honda ne’e kontinua halo mudansa ba tatika liu husi subtituisaun ba jogador sira hodi buka golu, maibé defenza husi Timor Leste kontinua ho disiplina hodi trava ataka husi Kambodia ho nune’e to’o termina jogu segunda parte Timor Leste mantein lídera ho score 1-0.
Husi rezultadu vitória ne’e lori ekipa Lafaek nurak U23 hakat ain uluk ba meus finais AFF sub-23 Championsip nu’udar juara pool ho pontus 7 husi joga dala tolu Manán dala rua no empata dala ida
Enkuantu Ekipa uma nain Kambodia obrigadu tenke okupa iha pozisaun segundu ho pontus 6 husi joga dala 3 manán dala rua no derota dala ida.
CharllY Junior