DILI- Orgaun Liga Futebol Timor-Leste (LFTL) hahu loke janela transferensia ba jogador nasional, nu’udár momentu atu klube iha divizaun dahuluk no daruak bele halo ezersisiu hodi aumenta ka reforsa sira-nia armada hasoru Liga tinan ne’e.
Liga Futebol Timor Leste anunsiu janela transferensia ba klubu nasional sira mak compete iha Primeira no Segunda divizaun, atu bele hahu buka dalan hodi hadia no haforsa sira-nia ekipa liu husi aumenta jogadór durante period janela tranferensia.
“Ohin ami hakarak anunsiu ba klube sira iha divizaun dahuluk no daruak, katak janela tranferensia ba jogador nasional sira, hahu ohin ami loke, komesa 21 fevereiru to’o 21 marsu 2022” diretor verikikasaun lisensa LFTL José Carvalho ba jornalista sira iha nia knaar fatin Bairro Formosa, Dili segunda (21/02).
“komesa ohin loron sekretariudu liga nian hala’o ona atividade hodi simu rejistrasaun ba lista jogador sira”, Nia hatutan.
Iha opurtunidade hanesan, orgaun LFTL hateten ba públiku katak janela transferensia ba jogador internasional hahu kedan iha semana kotuk tuir janela transferensia AFC.
“transferensia ba jogador internasional sira ami loke ona, komesa tuir janela transferensia AFC nian, ne’ebe komesa tiha ona iha loron 10 fevereiro to’o 10 marsu epoka 2022. maibe la taka dalan karik tempu ne’e seidauk to’o tarjetu lolos, ita bele halo alterasaun ruma. ida ne’e mosu bainhira iha prekupasaun ruma” Nia hateten
Enkuantu, LFTL sei hatur regulamentu katak kada klubu bele kontratu jogadór internasionál nain-6, iha ne’ebé tenki iha jogadór ázia nain-1 husi nain-6.
“jogador internasional tenki kahur malu, karik husi eropa ka Afika nain-5, tenki mos iha jogador Ásia nain ida, ida ne’e mak mekanismu ami sei hatuur, tanba liga sei lao tempu naruk ,para ekipa sira bele prepara, jogador sira reforsa sira nia ekipa hasoru kompetisaun ne’e” José dehan.
“kada klubu bele iha total jogadór nain 27, tuir regra normal ne’ebé implementa tiha ona”, nia reforsa.
Hanesan tinan kotuk, Liga Timorense epoka ne’e hala’o ho primeira divizaun ne’ebé sei compete husi klubu 10 no segunda devizaun sei compete husi klubu sira. Iha ne’ebé hahú ohin ba oin bele halo ona ezersisiu hodi hadiak sira nia ekipa.
ADS
