DILI- Confederação Desporto Timor-Leste (CDTL) simu ona proposta ka planu anual tinan 2022 nian husi federasaun tolu hanesan Federsaun Xadres Timor Leste, Biliard no Taekwondo atu realiza kampionatu nasional iha tinan ne’e.
“Iha momentu ne’e foin federasaun tolu, Xadres, Biliard no Taekwondo mak hatama planu anual 2022 nian mai konfederasaun mekanizmu foun ne’ebe ami halo mak planu anual federasaun sira tenki submete mai konfedersaun depois mak ami tau hamutuk planu sira ne’e foin ami submete ba SEJD” Prezidente CDTL Macario F. Sanches ba jornalista sira iha nia knaar fatin Caicoli, Dili tersa (8/03).
Nia afirma, planu sira ne’e razoavel no implementavel depois sira tetu tiha balun governu bele deside sira bele inklui, balun sira bele deside dehan lae depende ba disponibilidade orsamentu tanba ne’e mak planu anual sira tenki mai lalais para sira diskute hamutuk hafoin mak manda ba SEJD.
Prezidente hatutan, kampionatu nasional federasaun desportivu iha Timor-Leste hakarak organiza iha 2022 ne’e CDTL daudaun ne’e diskute hela ho SEJD katak kampionatu hotu-hotu ne’ebe mak federasaun sira hakarak halo ne’e la’ós de’it pedidu ba governu maibe governu iha orsamentu programadu ne’ebe bazeia ba planu anual sira ne’ebe mak sira tenki submete.
Nia akresenta, federasaun sira iha 2022 seidauk iha planu anual ba kompetisaun oinsa mak governu bele fornese orsamentu para sira halo kampionatu nasional tanba ne’e mak iha diskusaun sira hasai ona karta ba federasaun sira para bele hatama sira nia planu anual ne’ebe sira halo planu anual 2022 no 2023 nian tanba agora sira tama ba prosesu elaborasaun planu anual 2023 sira tenki prepara ona planu 2023 so planu anual iha mak bele husu osan ba SEJD hodi halo kampionatu nasional .
“Horseik no ohin ita haruka karta ba federasaun sira para atu hatama planu annual 2023 mai konfederasaun no ami hein katak fulan marsu remata federasaun sira submete ona planu annual 2023 mai CDTL” Nia dehan
Enteretantu Federsaun sira ne’ebe mak hamahan an iha CDTL hamutuk 37 maibe foin federasaun tolu mak hatama proposta ba CDTL mak Federasaun Xadres, Biliard no Taekwondo no konfederasaun hein hela federasaun sira seluk nia proposta.
ADS
