DILI—Treinadór ekipa selesaun nasionál sub-19 Eduardo Pereira hakarak lori jogadór sub-19 to’o faze semi final iha kompetisaun ASEAN Football Federation (AFF) sub-19 iha mak sei hala’o iha Jakarta 2022.
Treinadór afirma, Timor-Leste liu husi FFTL sei lori ekipa selesaun nasionál sub-18 ba partisipa kompetisaun AFF, iha Jakarta tinan ida ne’e.
“Ha’u nu’udar treinadór hakarak ita bele to’o faze semi final iha eventu AFF U-19 iha Jakarta tanba maioria jogadór iha esperiénsia ona ne’ebé jogadór husi sub-18 nian mós tuir ekipa selesaun nasionál sub-23 iha Vietname”, hatete treinadór selesaun nasionál sub-19 Eduardo Pereira ba jornalista iha fatin treinamentu fíziku Gym Base Camp Fatu-hada, Dili tersa (08/03).
Nia esplika, jogadór na’in sanulu mak iha selesaun nasionál, entaun halo selesaun final ba sira ne’ebé agora prepara hela atu hamutuk ho sira fiar katak sira sei bele halo buat ruma iha kompetisaun ne’e iha fulan Jullu tinan ne’e.
Treinadór ne’e afirma, Selesaun sub-18 prepara hela ba AFF sub-19 iha Jakarta, halo preparasaun durante fulan tolu ona ne’ebé jogadór na’in sanulu husi sub-23 nian hodi mai haforsa tan selesaun nasionál sub-18 jogu AFF tinan ne’e.
Eduardu informa, jogadór sira seluk preparadu no sira nia kondisaun, stamina no fíziku di’ak, hodi treinu hamutuk ho selesaun nasionál sub-23 nian no preparasaun hahú ona sei remata iha fulan Juñu.
Treinadór selesaun nasionál ne’e mós husu ba parte governu liuliu sekretáriu estadu juventude no desportu (SEJD) ho federasaun futeból Timor-Leste (FFTL) bele servisu hamutuk bele fó apoiu ba ekipa selesaun nasionál sub-19 nian.
Eduardo informa, tuir regra ne’ebé mak iha, kada nasaun tenke lori jogadór na’in-23, maibé agora situasaun covid-19 bele rejistu jogadór liu standard ne’ebé komisaun organizadora hasai ona.
Eduardo afirma, jogadór sira ne’e mai husi klube AD SLB Laulara, Emmanuel FC, Lalenok United FC, DIT FC, AS Ponta Leste, Sentru juveníl Dili, Baukau no Covalima hamutuk jogadór na’in-35 depois sei halo selesaun final hodi hamutuk ekipa selesaun nasionál sub-23 hodi kompleta ba jogadór nain-23
Iha fatin hanesan kapitaun ekipa selesaun sub-19 Sandro Rivaldo Casimiro Lima Quintão hatete, nia parte agradese tebes bele tama ekipa selesaun nasionál sub-19 nian.
Kapitaun ne’e haktuir, daudaun ne’e sira prepara másimu ona atu ba kompete jogu iha AFF U-19 iha Jakarta Indonesia.
“Ha’u agradese tebes bele tama ekipa selesaun nasionál sub-18 agora ami prepara para atu ba joga iha AFF sub-19 iha Jakarta, ho preparasaun ne’e ami ba sei halo buat di’ak no hamorin ita nasaun nia naran liuhusi ami nia talentu futeból ida ne’e”, tenik nia
ADS
