DILI-Federasaun Futebol Timor-Leste (FFTL) no Orgaun Liga Futebol Timor-Leste (LFTL) seidauk fo sai kalendariu Liga epoka 2022 ho klaru tan ne’e klube sira kompete iha divizaun dahuluk no daruak Liga Timorense la brani kontratu jogador internasional hodi reforsa sira nia ekipa.
Too oras ne’e daudaun parte FFTL no LFTL seidauk fo sai klaru Kalendariu kompetisaun, ho nune’e, Klubu seidauk brani hodi kontratu jogador internasional hodi reforsa sira-nia ekipa ba liga Timorensse Epoka 2022.
“Tanba klube sira seidauk hetan klareza kompetisaun sira seidauk brani atu lori jogador Mai Timor-Leste karik ida ne’e sai kestaun ba klube sira to’o agora seidauk rejistu maski Janela transferensia ne’ebe Ita halo ona iha loron 10 fulan fevereiru to’o 10 marsu 2022 seidauk iha klube ida mak kontratu jogador internasional” adjuntu sekretariu Frederico Martins ba jornalista sira iha nia knaar fatin Bairro Formosa, Dili segunda (21/03).
Sekretariu hatutan, antes fo sai ona husi orgaun Liga janela tranferensia jogador internasional husi loron 10 fulan fevereiru to’o 10 marsu 2022 no ohin loron transferensia ikus ba jogador nasional,
“Sei halo enkontru entre lideransa FFTL no LFTL hodi aparmalu hodi bele anunsiu dala ida tan liga ba tinan ne’e hodi fo hatene ba klubu sira katak liga sei hala’o iha epoka ne’e maibe tenki iha konkordansia entre LFTL no FFTL hodi Liga bele La’o susesu tuir ema hotu nia hakarak“, Nia reforsa.
Antes ne’e, Klubu Liu Ida Mak fo sai ba Publiku kona-ba jogador estranjeiru ne’ebe atu Mai reforsa iha liga Timorensse Epoka 2022, Maibe to’o Agora parte FFTL seidauk hatene, ho nune’e Federasaun lakoi atu akontese jogador estranjeiru ilegal iha Timor Leste.
“Ne’ebe federasaun lakoi akontese jogador ilegal husi estranjeiru atu joga iha Timor-Leste maibe hotu-hotu tenke tuir rejistrasaun ofisialmente hodi nune’e karik akontese buat ruma ba jogador sira ita bele justifika tamba buat ida jogador estranjeiru ne’e sai kestaun sensitivu ba FIFA” Frederico informa
Ba klube sira hakarak hala’o transferensia ba jogador internasional Mak tenki komunika mai parte federasaun tanba ida ne’e flexível , atu nune’e bele deside hamutuk hodi estende fali janela transferensia.
ADS
