DILI- Asosiasaun Futsal Timor-Leste (AFTL) sei rezolve uluk kampu futsal hafoin hala’o Liga Futsal Timor-Leste iha tinan ne’e ne’ebe pedidu ba hadia kampus sira hatama ona ba parte F-FDTL para hetan aprovasaun hodi hadia kampu taka kakuluk leten no halo tribun haleu kampu.
Tinan ida ne’e asosiasaun futsal sei rezolve uluk kampu futsal hafoin sira hala’o liga ne’ebe sira planu atu hadia kampu futsal F-FDTL hodi taka kakuluk leten no halo tribun haleu para jogador sira bele joga ho fatin ne’ebe dignu.
“Liga futsal tinan ida ne’e bainhira selesaun fila husi Tailandia ba AFF Futsal Championship ita sei loke janela transferensia ba Jogador depois ida ne’e ita hala’o kedas liga maibe kondisaun kampu presiza hadia oituan mak ita bele hala’o liga ne’ebe iha enkontru dahuluk exco FFTL nian parte AFTL hato’o ona kestaun ne’e iha reuniaun ne’ebe sira aseita ona buka fatin liuliu kampu futsal F-FDTL nian ne’ebe nia pedidu prepara tiha ona hodi fo ba parte F-FDTL para sira bele fo kontratu hodi permite ita uza kampu tinan 10 ka 15 para ita hadia kampu ne’e, kakuluk leten taka tiha no halo tribun haleu para jogador sira ho dignu oituan tanba tuir lolos kampu ida agora ne’e la dignu ita atu uza maibe kondisaun mak hanesan ne’ebe la buat ida maibe tenki hadia buat balun” sekretariu jeral AFTL Fernando Baptista ba jornalista sira iha Xanana Sport Center Bairro Formosa, Díli segunda (21/03).
Sekretariu hatuan, hadia kampu futsal hanesan AFTL nia planu antes ne’e depois pra liga hadia kampu mak sira komesa fali liga ne’ebe pedidu ne’e ba ona parte F-FDTL karik sira aseita iha tempu badak, fulan ida ne’e sira komesa loke tenderizasaun Lori mai exco FFTL aprova para sira hadia kampu ne’e, para selesaun nasional futsal Timor-Leste ba joga iha AFF Futsal Championship 2022 kampu komesa hadia ona depois sira fila mai iha fulan abril kampu ne’e hadia ona sira loke janela tranferensia depois fulan tuir mai liga bele la’o.
Fernando dehan, sira hakarak liga futsal divizaun dahuluk no daruak la’o dala ida feito maibe difikuldade mak infrastrutura ne’ebe karik hadia tiha kampu futsal F-FDTL bele halo orariu ba eventu rua ne’e
“Ita Hakarak liga futsal divizaun dahuluk no daruak bele la’o dala ida deit maibe ita nia difikuldade mak infrastrutura karik ita nia kampu mak rua no posibilidade ita halo kampu agora nia kakuluk leten taka no tribun haleu, ita niar liga rua bele la’o dala ida deit tanba udan no anin mos la kauza ona, ita bele halo orariu loron kinta, sesta, sabadu hala’o divizaun dahuluk no Segunda, tersa no kuarta la’o ho divizaun darauk depende ita mak jere ona orariu jogu sira ne’e” nia hateten
Nia hakotu, klube ne’e sei kompete iha liga futsal divizaun dahuluk iha tinan ne’e hamutuk 10 mak Ramelau FC, Mushila FC, Mauputar FC, São Francisco FC, Caesar Dante FC, Becusse United FC, Boa Sorte FC, Gamer FC, AD Samoro no Jerman FC no iha divizaun daruak hamutuk 14 mak Coelho FC, Bermeta FC, M-VDL Lahane, Santa Cruz FC, Maudoko FC, Boavista FC, Kuda Ulun FC, Crazy Horse FC, Fitun Estudante, Estrela Baguia, Baucau All Star, B’Tal FC, Kablaki FC no Academica FC, klube sira ne’e mak kompete ona iha pra liga iha tinan Kotuk klube sanulu mak promovidu ba divizaun dahuluk no klube 14 mak sei kompete iha divizaun daruak.
ADS
