Tailandia – Selesaun Nasional Futsal Timor-Leste susesu halakon klube University Tailandia Thonburi FC ho skore 7-0 iha jogu tryout daruak ne’ebe mak hala’o iha indoor Thonburi University kinta (31/03).
Iha inisiu jogu Primeira parte ekipa rua hotu hotu hatudu jogu di’ak liu husi kontra no ataka ba, maibé ekipa Selesaun nasionál Futsal Timor Leste ne’ebé hatudu ritmu jogu konsege domina bola hodi lansa suta fila fila ba rede ekipa adversariu Thonburi FC, konsege hetan rezultadu pozetivu ba ekipa Lafaek tanba konsege marka golu tolu iha Primeira parte liu husi jogador João Paulo, Rómulo Escurial no Miguel Lay Fernandes halo redi ekipa aniversariu nakdoko hodi halo ekipa Lafaek konsege lidera primeira parte ho skore 3-0.
Ekipa Thonburi Fc la’ós la iha tenta halo kontra atake ba ekipa Selesaun nasionál Timor-Leste maibé guarda defensivu husi ekipa Selesaun Nasional hatudu nia disiplina no no solidu ho nune’e la rezulta golu to’o termina jogu primeira parte Timor Leste save metin score 3-0.
Kontinua ba jogu segundu parte ekipa Lafaek hasae liu tan intensidade jogu ho núne’e defeza husi ekipa Thonburi Fc lakon kontrolu ho nune’e selesaun nasionál konsege marka tan golu haat tuir tuir malu liu husi jogador Joao Paulo, Venceslau Fatima Bendito Ros no Ruben Faria hodi hatuur score ba 7-0
Ekipa Thonburi Fc tenta halo kontra atake ba selesaun lafaek maibé ekipa lafaek kontinua la fó fitin ba ekipa Thonburi Fc hodi marka golu ho nune’e to’o termina jogu score mantein 7-0.
Antes ne’e ekipa Selesaun Nasional hala’o uluk try out ho ekipa KBU Fc no ekipa Selesaun nasionál konsege manán ho score 10-3.
Enteretantu Jogu try out ekipa Selesaun nasionál Timor-Leste nian hanesan faze preparasaun ida ba ekipa selesaun nasionál molok kompete iha AFF futsal Championship 2022.
Enkuantu iha jogu AFF Futsal Championsip iha Tailandia ne’e selesaun nasionál Futsal Timor Leste iha pool B hamutuk ho Vietname Myanmar no Austrália
No tuir orariu Timor Leste sei hahú jogu iha 04 fulan Abríl kontra Austrália, no sei kontra Vietname no ikus liu sei hasoru Myanmar hodi taka faze grupu.
ADS
