DILI— Atleta Selesaun Nasional Federsaun Boxing Amadora Timor-Leste (FBATL), Sabio Ramos, sente triste, ho desizaun Governu ne’ebé mak elimina atleta sira husi Federsaun 7 ho Modalidade 8 ne’ebé mak dadaun ne’e perparadu ona atu reprezenta Timor-Leste hodi partisipa iha Sea Games iha Vietname fulan Maiu tinan ne’e
Tinan ne’e Timor-Leste sei partisipa ba-iha Sea Games (Jogu Sudeste Aziátiku nian) ba da- 31 ne’ebé sei hala’o iha loron 12 to’o loron 23 fulan-maiu, iha Vietname.
Timor-Leste reprezenta ba-iha modalidade hirak hanesan tuir mai: futeból, Boxe, Atletismu, Karate-do, taekwondo, Fahkuptil, Natacao no ikus liu Modalidade Body Bulding maibé Modalidade refere diside ona hodi kansela sira nia partisipasaun ba Sea Games iha tinan ne’e.
Antes ne’e mós governu liu husi Sekretáriu Estadu Juventude no Desportu (SEJD) Abrao Saldanha, informa, inisiu sira atu limita Modalidade, maibé ikus mai nafatin ho Modalidade ne’ebé rezistu ona, maibé tanba fator osan ne’ebé menus ho nune’e Governu deside redus de’it atleta.
“Foun-foun ne’e ita hanoin atu limita modalidade, depois ami nafatin ho modalidade ne’ebe rejistu tiha ona, maibé ita iha problema ba orsamentu tanba fator osan ne’ebé menus ho tempu covid-19 ne’e viazen Karun liu ka presu dupla kompara ho tempu normal entaun ida ne’e implika ba orsamentu tenki reduz duni atleta ne’ebe ita nia politika governu iha ba laos partispa maibe kompete para hetan medalla“, SEJD Abrão N. Saldanha ba jornalista sira iha nia knaar fatin Lecidere, Díli segunda (4/04).
Maibé Relasiona desizaun governu, ne’ebé mak deside hodi elimina atleta husi federasaun 7 ho modalidade 8, ho núne’e Atleta na’in-2 husi federasaun Boxing Amadora Timor-Leste (FBATL) sente triste bainhira elemina tiha hodi la partisipa jogu internasionál Sea Games, ne’ebé mak sei hala’o iha Hanoi Vietname, fulan Maiu tinan ne’e.
Atleta selesaun nasionál na’in-2 ne’e mak, Sabio Ramos ho Elidio Da Conceição, husi modalidade boxing.
Ba jornalista sira atleta Sabio Ramos espresa sentimentu triste, tanba governu foti desizaun hodi elimina atleta sira.
“Ha’u sente triste tebes, tanba governu diminui atleta, ho razaun osan mak laiha, ami husi boxing ami hamutuk na’in-5, maibé diminui ami na’in-2 daudaun ne’e”, hatete atleta selesaun nasionál FBTL, Sabio Ramos ba jornalista iha jináziu Kaikoli, Dili kuarta (06/04).
Ramos afirma, durante sira prepara hahú Janeiru to’o ohin loron, horisehik mak foin rona rezulta katak atleta na’i-2 elimina, no la partisipa iha eventu refere.
Atleta selesaun nasionál ne’e informa, governu fó desizaun ne’e urjente, tanba osan mak laiha, sente triste maibé simu realidade ne’ebé akontese ona.
Ramos dehan, maski la partisipa iha eventu refere, iha vontade nafatin hodi treinu no sei la hamate vontade nu’udar atleta ida.
Atleta ne’e hato’o nia esperansa katak, suporta nafatin nia maluk atleta na’in-3 ne’ebé daudaun lori modalidade Boxing no nasaun TL nia naran tenke esforsu makaas.
“Maski ha’u ho kolega la partisipa mós ami suporta no orasaun nafatin ba kolega na’in-3 ne’ebé partisipa ne’e tenke joga ho di’ak”, tenik Ramos
Iha sorin seluk Elidio da Conceição espresa nia sentimentu ho tristeza tanba la partisipa iha eventu sea games ne’ebé sei akontese iha tinan ne’e.
“Ha’u sente triste tebes tanba durante treinu mak to’o tempu atu ba, rona rezultadu dehan ami na’i-2 mak la partisipa”, Elidio espresa nia sentimentu ho triste.
Nia dehan, hanesan atleta ida nafatin esforsu, maski la partisipa iha jogu ne’e, hodi prepara ba eventu tuir mai.
Nune’e mós atleta Deliu Isaac Mouzinho, espresa sentimentu, triste tanba na’in-2 mak la partisipa, durante treinu hamutuk to’o rezulta ikus elimina sira nia viajen.
“Ha’u sente triste, tanba durante ami na’in-5 treinu hamutuk to’o ikus mai ami na’in-3 mak ba kompete”, tenik nia.
Nia informa, maski atleta na’in-3 mak partisipa iha sea games, no esforsu hodi hatudu rezultadu di’ak nafatin
CharllY Junior
