DILI- Federasaun Futebol Timor Leste (FFTL), sei hasae uluk kualidade rekursu umanu hanesan arbitu no Treinador molok realiza liga futsal ba primeira divizaun no segundu divizaun, tanba to’o oras ne’e Treinador Futsal ho level 1 Timor seidauk iha.
Kestaun ne’e hato’o husi, adjuntu Sekretariu Jeral FFTL, Frederico Martins ba Jornalista sira iha FFTL, Dili, Segunda (24/04/2022).
“Liga Futsal tuir orariu tentativa ne’e atu hala’o iha junhu maibé tanba ida ne’e ita tama ona liga 1 no 2 entaun ami hakarak prepara lai rekursu umanus, signfika katak treinador arbitu tenke kualidade mós tanba ita hotu hatene katak treinador futsal Timor iha level 1 ne’e seidauk iha”tenik nia .
Nia dehan sira sei fokus uluk lai ba iha rekursu umanus, i fulan junhu instruktur sira sei mai hodi fo treinamentu , depois treinamentu ne’e hotu ou durante treinamentu la’o sei iha jogu ida, maibé liga sei la’o duni iha fulan junhu maibé hare mós ba forsa rekursu umanus ne’ebé mak hetan, I tinan ida ne’e komesa hahu ona implementa lisensamentu klubu ba iha futsal nian, hodi nune’e sira bele hetan estrutura ou manejamentu no jestaun klube ne’ebé mak di’ak.
Nia informa durante periodu ida ne’ebé mak naruk hahu husi fulan maiu to’o junhu ne’e sei halo treinamentu barak liu ba klubu sira konaba rekursu umanu ka ou forsa rekursu umanus husi klube sira nian.
“Ita mos sei esplika ba iha klube sira konaba kestaun tekniku, ne’ebé tenke halo loos tiha buat sira ne’e hotu mak ita ba tama kampo laran ne’e buat hotu hotu la’o tuir ,laos 100% atu loos maibé ita minimiza kritika”tenik nia.
Tuir Nia, orariu ba klube sira nian iha tiha ona, federasaun liu husi AFTL sei hato’o ba sira atu nune’e sira bele prepara sira nia aan no karik buat hotu loos tiha ona treinamentu ba treinador sira loos hotu ona , komponente hirak ne’e kompletu bele hahu ona liga futsal.
Parte ida seluk mos tenke hare kondisaun infraestrutura nian hanesan hotu hotu hatene katak duante kompetisaun uza de’it kampu futsal Fatuhada maibé komunikasaun ikus katak kampu futsal Fatuhada sei rehabilita, nee duni la iha tan posibilidade atu uza iha ne’ebá
Antes ne’e sekretáriu jerál AFTL Fernando Batista, hatete, Liga Futsal Primeira Divizaun sei hahú iha Juñu no Segunda divizaun sei hahú iha Agostu.
“Ita nia janela tranferensia ba jogador sira ami sei loke iha fulan maiu, divizaun dahuluk liga futsal ami sei hahú iha fulan junu no divizaun daruak ami sei hahu iha fulan agostu tuir kalendariu tentativa ne’ebé mak ami submete ona ba federasaun ne’ebé ami hein de’it aprovasaun tanba apoiu finanseiru hotu ba ami nia atividade mai husi federasaun”, Sekretariu jeral AFTL Fernando Baptista ba jornalista sira iha Bairro Formosa, Dili sesta (22/04).
Enteretantu klubu ne’ebé atu kompete iha Liga Futsal Timor Leste primeiru divizaun hamautuk 10 mak hanesan, Ramelau Fc, Mushila Fc, Mauputar Fc, Boa Sorte Fc, Becusse United, Sao Francisco Xavier, Caesar Dante Fc, AD Samoro, Gamer Fc, no Jerman Fc.
Enkuantu klubu segunda divizaun hamautuk 14 mak hanesan, Coelho Fc, Bermeta Fc, VDL Lahane, Santa Cruz Fc, Maudoko Fc, Boavista Fc Kuda Ulun Fc, Crazy Horse, Fitun Estudante, Estrela Baguia, Baucau All Star, B’tal Fc, Kablaki Fc no Academica Fc.
CharllY Junior
